承傳中華美食搞競賽助創業 霆鋒重賞廚神：200萬擺喺度！
謝霆鋒主理的美食節目《鋒味》將舉行美食競技，招攬各地民間廚神進行多輪PK賽，出線者可隨霆鋒的「鋒廚」團隊與全球大廚比併，最後三名終極廚神除可揚名海外，更可瓜分200萬港元獎金，霆鋒有此構思全因想推動中華美食，望能像中國功夫一樣，得以保存並承傳下去。
前晚謝霆鋒在《鋒味》官網上霸氣公布天下：「港幣200萬擺喺度，有膽就嚟攞！」據悉他正密鑼緊鼓籌備最新的美食節目《鋒味》，並進化為美食競技比賽，將召集全球民間隱世或著名廚神參加《鋒味》海選賽，勝出的參賽者可加入霆鋒的《鋒味》團體迎戰全球美食高手，更有機會瓜分逾200萬港元獎金，參賽一次可以名利雙收。
8月PK賽三甲分獎金
日前霆鋒接受訪時表示：「我會揀60個人同我8月中喺上海搞3日PK戰，經一輪廝殺，最後Foul剩嗰8個就入我個團隊，然後周遊列國同其他大廚挑戰，依家已經好多人，包括星級大廚想挑戰鋒味！可以同我捱到最後12集嗰三個，可以得到超過200萬港元嘅創業基金，第一名有100萬，第二名50萬同第三名係30萬（人民幣）。」霆鋒補充說希望這筆創業基金，能幫助對美食有夢想又缺乏資金的人圓夢。
打仗最難就係默契
問到可會舉行明星賽？霆鋒直言有很多明星嘉賓，但他事先聲明不會偏私：「有幾多可以同我哋一齊參賽就要睇佢哋自己。」他直言海選除對參賽者是挑戰外，對他的《鋒味》團體亦是考驗，他說：「覺得呢場仗最難打，如果幾咁好彩搵到啲好勁好勁嘅人，又幾咁好彩畀我搵晒中餐西餐，世界各地唔同餐都好，最難搞一定係默契，冇默契再犀利都打唔到落去。」霆鋒又以中國功夫比喻美食，覺得中餐常被誤解，倘若再不為中餐出分力，恐怕就如功夫一般會漸漸流失成為傳說。
文：音樂組