麥芷誼嫌悶 拋棄初戀情人
藝人麥芷誼（Koyi）幕前形象大膽主動，本以為她拍拖經驗豐富，豈料原來大學時期才開始談戀愛，初戀只維持了一年多，最終她因為覺得悶而提出分手。這天她重返母校，重遊二人相識相愛之地，不禁自嘲衰人，不過驀然回首，初戀亦是一段美好回憶。
Koyi是理工大學時裝設計系畢業生，這天她重返母校，帶讀者走遍「理大」多個特色角落，包括「半圓」、長樓梯、鐘樓及校園餐廳，每個地方都有一段故事，當中最令她難忘的是發生在「半圓」的初戀故事！她先解釋「半圓」這個名稱的由來，指該處有一條圓柱，而椅子沿圓柱而建，圓柱附近是各個學會的房間，她說：「我同初戀男友喺度識，拍拖前後都成日嚟呢度聚會。」
SMS令感情升溫
問到初戀萌芽的過程，Koyi娓娓道來：「我哋係參加迎新活動識，我係Freshman，佢就負責搞活動，暑假有好多活動認識大家，嗰時就識咗佢。其實初初冇諗過同呢個人拍拖，佢唔靚仔，佢自己都知，哈哈！我一開始諗拍拖梗係搵高大靚仔，顏值好高嘅，但其實佢好有才華，講嘢好叻，係活動嘅MC，同埋講嘢好有說服力，令我好欣賞佢！」
起初二人都表示不想拍拖，覺得拍拖很麻煩，其後卻有轉機，她說：「點知做做吓朋友，突然間會掛住，嗰時未有WhatsApp，得SMS（短訊），當時考試、日日做Project做到冇得瞓，留喺宿舍苦惱時，大家開始SMS傾偈，跟住日日都傾幾百個SMS！自從嗰次開始，我哋發覺鍾意咗對方，之後好順理成章一齊。」兩人的戀情只維持了一年多，最終由Koyi提出分手，她說：「係自己衰嘅，因為初戀好快覺得悶，冇咩特別，自己諗『係咪淡咗呢？不如做番朋友啦！』但其實佢一直好錫我，係我唔好，大家千祈唔好做我呢啲衰人！我哋依家係好朋友，我讀大學淨係拍過呢次拖。」
爛瞓學生跑長樓梯趕上堂
Koyi認為鐘樓和長樓梯亦充滿回憶，她指鐘樓是「等人勝地」：「約人等都喺呢個位等，係大學中心點。」長樓梯則是畢業相必影位，她說：「諗番起以前同家人影畢業相嘅回憶，同埋我以前唔係一個好勤力嘅學生，日頭要上8點半堂，基本上一定唔知醒，好辛苦死死哋氣醒咗，人哋已經開始上堂啦！條樓梯好窄，跑落去都差啲仆親，有幾次差啲碌落去，好彩冇毀容！」
開飯一味靠嗲
校園內有多家餐廳供學友選擇，Koyi表示很懷念大學時期的美食：「以前上『天地堂』，中間有時間會返宿舍或者去食嘢。呢度有好多Canteen，今次我返嚟食美國菜，配合國際化嘅學生，以前就成日去『頹Can』，佢個雞髀紅豆冰超正！」
Koyi又表示以往買燒味飯時，會撒嬌說：「我想要瘦啲叉燒同多啲菜。」自言因笑容燦爛，燒味哥哥通常會滿足要求。問到是否校花？她說：「我唔係，我讀嗰個系啲女仔好靚，又着得好靚！我試過遲到冇打扮，直頭唔想入課室！」她又分享參加聯校High table dinner（高桌晚餐）的趣事：「記得第一次參加，坐我對面係喺科大讀醫嘅男仔，但佢淨係掛住食！」
後記：做朋友定做情人？
Koyi個性活潑好動，游走母校各處時表現雀躍，又滔滔不絕地大談往事。她笑言已畢業數年，今次是第一次回母校，又偷偷說曾考慮與初戀男友復合，無奈隨時間漸去，發現彼此做回朋友關係或更長久，所以說學生時期最快樂，初戀亦是最難忘。
文：李惠儀
攝：唐豁莊