合作拍劇周身傷 吳海昕想殺王宗堯報復
吳海昕外表斯文，但當她在新劇初嘗殺人滋味後，竟上晒癮話要殺埋「眼中釘」王宗堯！王宗堯則自爆被對方詛咒，撼腫頭搞到不省人事：「失去知覺，不停流口水！」
藝人王宗堯、陳炳銓（Danny）和吳海昕（Sofiee）日前在火炭拍攝ViuTV新劇《賤民20》，期間樂隊RubberBand成員泥鯭帶同三個果盤前來探班，令現場台前幕後都歡呼尖叫！劇組當日拍攝Sofiee盛怒下殺人的場面，Sofiee指角色因感情受創而變得「神神哋」：「接呢套劇其中一個原因係因為可以殺人！（你最想殺同劇邊個？）王宗堯，我手手腳腳都畀佢撞瘀晒！Danny係整蠱我多，冇身體上傷害我。」
踢波撞頭腦震盪
至於被視為眼中釘的宗堯就指Sofiee記仇：「一次咋嘛！我都受傷啦，唔知係咪佢詛咒我！」他表示之前踢波時太搏命，頂波時竟與隊友頭撞頭，最後由額頭腫到下巴：「當時搞到有少少腦震盪，暈咗都唔知幾耐，佢哋話我係完全失去知覺同不停流口水。」
至於前來探班的泥鯭就表示想殺死自己的黑暗面：「我裝過人沖涼。」Danny忍不住問偷睇對象是否與他親近，豈料泥鯭答：「都唔係o架，你試吓望吓銅鑼灣啲樓，好多人好Open開晒窗，做咩都有，有冇着衫都有。」
文：影視組