Tim陪做空中瑜伽減壓 楊洛婷產後趕工博三年抱兩

前港姐楊洛婷與樂隊Dear Jane成員黃天翱（Tim）即將榮升父母，她早前挺着六個月大肚偕Tim齊齊做空中瑜伽，幫助紓緩腰椎及盤骨，而導師正是Tim的妹妹Rebecca。楊洛婷每做一個動作，Tim從旁協助望到實，還互相為對方按摩頭部，甜蜜爆燈。

BB邊做邊踢好「瑜」快

楊洛婷直言曾學習空中瑜伽，想不到懷孕後仍可繼續做：「某啲動作係冇問題，我一路做就BB一路踢我，佢都好舒服！每次我好興奮嘅時候，BB就會好興奮同踢我，好活躍、紮紮跳。」提到還有三個月便出世，Tim表示心急想見BB，但又擔心不夠時間準備：「我哋要整間房畀BB。（學定湊仔經？）之前同朋友食飯，突然叫我幫手抱佢個三個月大嘅BB，我第一次抱咁細個嘅BB，又第一次餵奶同掃風，好想快啲可以日日做。」除了渴望BB出世外，她已計劃生第二胎：「我唔想兩個年紀差太遠，所以諗住生完幾個月就即刻再開工，阿Tim話自己Ready，但都要佢畀個期我先得囉！」

楊洛婷稱現時仍繼續工作，以輕鬆為主，反而Tim忙個不停，跟其他歌手合作又有新歌派台，稍後還會到澳門及內地開騷，搞到計劃自然分娩的她擔心作動時老公不在港：「我預產期係9月尾至10月頭，阿Tim咁啱9月尾喺外地有騷，如果佢唔喺香港，我點算呢？」Tim指有意請假陪太太坐月，但楊洛婷笑說：「我請咗個好好嘅陪月，我想阿Tim勤力工作搵奶粉錢，搵錢出糧畀陪月就得！」

楊洛婷指做瑜伽時感受到BB踢腳。	Tim陪楊洛婷倒吊，紓緩腰椎壓力。	楊洛婷在導師Rebecca協助下，肚凸凸一樣做得空中瑜伽。

文：名人組

鳴謝：EPIC YOGA

Tim髮型：Jamie Lee@HAiR