Ben Sir開騷玩盡粗口諧音 季蘋蘋胸壓6號 麥美恩忘我灑鹽花
人稱Ben Sir的歐陽偉豪前晚開騷，與嘉賓大講有味笑話及粗口諧音，其中無綫小花季蘋蘋更胸壓陸浩明。雖然表演內容踩界，但嘉賓之一的麥美恩不擔心影響港姐形象：「你仲記得？」不排除日後會在戲中爆粗！
節目主持人兼大學講師歐陽偉豪（Ben Sir）前晚在九龍灣舉行棟篤笑《Ben Sir開Show》，期間Ben Sir與嘉賓陸浩明（6號）、麥美恩、林頴彤及季蘋蘋齊齊大講有味笑話及粗口諧音，包括以《張李太太交換砌》及《小姐接蕉》等風月片名教廣東話，又將無綫節目名由《食平D》改成《食女平D》，令觀眾捧腹大笑。一班女藝人搵6號示範撒嬌時，季蘋蘋捉實6號的手兼胸壓對方，其他人即提醒他的女友同樣在場睇騷，非常有趣。
提到表演內容勁踩界，麥美恩被問到會否擔心形象受影響？她事後接受電話訪問時說：「我喺台上面都冇講到嗰『五大將軍』，主要都係等大家代入情景，令大家有共鳴。（做戲講粗口冇問題？）睇情況，為講而講冇意思。（你係港姐喎！）你仲記得？好耐冇人咁樣形容我。」
撞正結婚22周年
Ben Sir騷後受訪時指昨日是與太太結婚22周年，問到結婚周年撞正開騷，太太可有投訴？自言有超水準演出的他笑說：「冇投訴，之後補番慶祝。」講到整個演出零粗口，Ben Sir坦言：「講出嚟就唔好玩，人哋唔係想睇我爆粗，係想睇我點去演繹，我又唔係咩偉大人物，爆粗冇乜特別。」
文：影視組