劉美娟出山拍劇 苗僑偉電到吳思佳口啞啞

保養得宜的美娟大爆獲無綫高層樂易玲邀請「出山」，能與「偶像」苗僑偉合演夫妻，她直呼超正：「結咗婚幾多年就有幾多年冇拍劇！其實之前有人搵過我，但今次樂小姐搵我，畀我覺得心態上已Ready。我對仔女一個10歲，一個8歲半，加上無論角色、劇本，甚至班底都係以前嘅戰友。而且三哥（苗僑偉）係我偶像，以前喺無綫冇機會合作，咁多年後第一次合作能夠演夫妻，好開心！」美娟笑言冇在意酬勞：「真係冇計，相信（無綫）唔會蝦我嘅！」

三哥變白 被笑發霉

而苗僑偉則透露新劇兼備溫情戲及動作戲，又指與美娟首次合作，感覺良好。他又透露該劇應拍到9月，問他屆時會否曬得更黑，惹太太戚美珍微言？他笑說：「佢識我第一日就知我黑到舊炭咁，佢見我白咗會問做咩咁白？係咪發霉？所以我外景曬黑啲仲好。」

劉美娟（右）與吳思佳「母女情深」。	吳思佳（右起）、劉美娟及苗僑偉新劇飾演一家人。	苗僑偉借拍外景機會曬得健康膚色。

第一次見 面紅耳赤

至於飾演苗僑偉女兒的As One成員吳思佳，首次拍劇便要不時向對方撒嬌，她直認被苗僑偉電暈：「好緊張，佢太靚仔！我第一次見到佢時完全講唔到嘢，面紅耳赤，搞到全場都尷尬埋一份。」

文：影視組