成龍感觸賣命做武行

成龍昨日亮相在北京成龍藝術中心舉行的「成家班四十周年活動」，獲曾志偉、洪天明、陳德森、元華及元彪等撐場，國際影星阿諾舒華辛力加（Arnold Schwarzenegger）等亦拍片祝賀。活動上播出一段10分鐘的紀錄片，當中剪輯了成家班的工作片段，亦有向已故成家班人員致敬，當中包括薛春煒及馮克安等，他們的家人亦有上台。台下的成龍與曾志偉看到紀錄片及致敬環節，不禁眼濕濕，成龍其後上台向成家班離世成員的家人獻花。

8億打造藝術中心

曾志偉上台時，盛讚成龍是具有號召力的人，並透露前日在港通宵拍攝綜藝節目，一度擔心未能出席活動，幸而最終仍能趕及，並表示拍攝期間，內地藝人王磊與孫紅雷一見到他就鞠躬，原來他們看過一段有關大家很疼錫成龍的短片，認為眾人很齊心，令他們深深敬佩，志偉亦指成龍是其偶像。

武行唔易做，成龍及志偉睇片後眼濕濕。	曾志偉	眾人出席成家班40周年活動及打手印。

受訪時，成龍坦言出席活動的感覺是「感動、感慨、感觸」：「做武行係人哋唔做嘅嘢，我哋賣命做，係流血、流淚咁做，同埋唔畀屋企人知。會上播嘅工作片段，其實等於出賣佢哋，好殘忍，希望大家多啲支持成家班！」提到活動在成龍藝術中心舉行，他指該處將設有全球最大型特技人訓練中心，亦有不少其他設施：「呢度面積有36萬平方米咁大，依家未開放晒，將會有度假區，當中有酒店、健身器材房、跑步徑同埋可容納1,000人嘅飯堂，建設費總共係8億人民幣，依家用咗7、8千萬左右，所以依家每日都努力開工搵錢。」

父子出碟打對台

此外，房祖名最近亮相公開活動，而他兩年前已開始籌備唱片，問到進展如何？成龍說：「仲搞緊，因為佢要自作、自唱、自拍，應該今年暑假發行。另外，祖名會幫我搞唱片，一搞都搞咗3年，嚟緊都會出，應該父子兵打對台。」