蘇永康有Amazing B 「企硬」揀歌聽

49歲歌手蘇永康（阿公）的太太今年3月誕下「慈姑椗」蘇展弘（Jazz），弄子為樂的他卻忘記今日是父親節，阿公受訪時說：「因為家父過世好多年，係老婆話同我慶祝先記起！」因蘇太前日起往歐洲公幹兩周，一家三口已提早在家中慶祝，他說：「我同老婆買咗個蛋糕仔，插支蠟燭就算數。（想囝囝叫聲爸爸做禮物？）叫媽媽先！媽咪辛苦啲！」

陪瞓孝順老竇

問到有何父親節願望？阿公坦言全家健康便夠，兒子雖得幾個月大，但在扶實下已能腳踏實「髀」，為父者已大滿足：「佢『企』得好穩o架喇！」又指囝囝深得遺傳，愛聽已故偶像陳百強的歌，阿公說：「陳百強啲歌全首聽晒，我啲歌就藐藐哋，識揀呢啲係有Taste！」談及三個月來邊工作邊湊B的日子，阿公認為開心比辛苦多，近日還發生兩件心甜事！他指有晚因在台北做騷後返港，但太攰而唔知醒餵夜奶，第二朝瞓醒時發覺Jazz全晚睡在他身邊：「老婆餵完冇抱番去BB床，嗰晚係第一次三仔乸一齊瞓！阿仔平時瞓覺好似打功夫咁郁手郁腳，但嗰晚冇嘈冇郁過，好似知我攰，識孝順老竇咁！太太呢排唔喺屋企，我諗住晚晚都陪仔瞓。」

另一次則是當阿公與太太及兒子玩FaceTime時，當他一講「Bye Bye」，Jazz立即扁嘴爆喊，阿公指感覺很Amazing：「佢好似唔捨得我咁！（想即刻返屋企？）如果仲有夜機，即刻走啦！」阿公坦言囝囝出世後「世界變」，早前遊日時竟用一整天買童裝：「以前叫我唔好買衫睬你都傻，依家畀人講中晒，只記得買BB衫。」

文：音樂組