9歲Celine Sing震《全美一叮》 瀏覽破2千萬

被封「香港小巨肺」的譚芷昀(Celine)日前以9歲之齡殺入美國才藝比賽《全美一叮》選拔賽,身為賽事有史以來最年輕的華人參賽者,可謂為港爭光!最厲害是她的歌唱片段在網上上載短短20多小時,就合共累積高達逾2,160萬的瀏覽次數!適逢今日父親節,擔任歌唱老師的Celine爸爸譚順生直言女兒的歌聲獲得如此大回響,就是最好的父親節禮物!

有「香港小巨肺」之稱的9歲女童譚芷昀(Celine)日前以個人名義,參加美國著名才藝比賽《全美一叮》(America's Got Talent)選拔賽,節目將於美國時間下周二播出。Celine是賽事有史以來最年輕的華人參賽者,她選擇以偶像加拿大天后莎蓮迪安(Celine Dion)的名曲《My Heart Will Go On》出戰,她一開聲就贏盡現場觀眾喝采,唱到完美高音位時更令出名挑剔的評判Simon Cowell少有地露出笑容及鼓掌支持。至於擔任歌唱老師的Celine爸爸譚順生就抱埋妹妹Dion撐場,他為愛女打氣,而媽媽就聽到感動落淚。原來兩人因為太喜愛莎蓮迪安而為女兒改名為Celine,妹妹就改名為Dion,姊妹合璧就成為「Celine Dion」!

譚順生:我哋就快再去比賽

Celine的歌聲除了震撼觀眾,更俘虜全球樂迷!皆因《全美一叮》節目的官方YouTube頻道與社交網Facebook上載了Celine的演唱片段,截至本港時間昨晚9時,片段上架短短20多小時,YouTube及Facebook合共累積高達2,160萬的瀏覽次數,認真巴閉!然而譚順生直言最近一次就是4月陪囡囡到美國參加比賽,只是因簽了保密協議而無法與人公開此開心事,他說:「最難係同個女話唔好講畀人知,因為我唔可以教小朋友講大話,惟有同佢講如果講咗就會損失呢個遊戲機會。」問何時再比賽?他說:「我唔可以講結果出嚟,但我哋就快要再去,個比賽9月會完,當然想個女繼續有得參賽。」

Celine的爸爸譚順生是歌唱老師,從小就教導女兒唱歌技巧,他前日更推出首張處男唱片,轉戰樂壇做歌手。對於囡囡的歌聲獲得巨大回響可覺是最好的父親節禮物?譚順生受訪時直認不諱:「為港爭光,係為國爭光至啱!(點教到個女唱歌咁叻?)要佢多啲聆聽人哋講嘢。依家啲小朋友好少聽人講嘢o架啦。(回響係最好嘅禮物?)都係o架!」提到父親節如何慶祝,他稱未知女兒如何安排,但其實Celine和妹妹Dion較早時已畫定畫兼拍下短片,見畫中寫上「Happy Father's Day!」及「父親節快樂!」,相信譚順生收到定必甜入心!

「佢當唱歌係生命」

問譚順生如何幫Celine在歌唱及學業上取得平衡?他直言女兒幸運地擁有不一樣的童年,女兒又難得地熱愛讀書:「難得芷昀好鍾意讀書又讀得好叻,所以好感恩!每次佢問我要咩生日禮物或父親節禮物,我都同佢講只要佢開心就夠!」他指女兒視唱歌為生命:「唔可以阻住佢,佢係當咗唱歌係佢生命。佢知要有把靚聲好緊要,所以好注重健康。」而已跟Celine及譚順生簽約的蕭定一就肯定其努力:「因為簽咗保密協議,Celine入唔入到圍,要等下周節目播出至可以公開。作為香港人去到呢個比賽上到電視,已經好難得。」

文:影視組

第一手消息請下載on.cc東網iPhone/iPad/Android