Tommy囝囝百日宴收吉利是
「樂壇小強」組合E-Kids三位成員輪流報喜，2月做了爸爸的Tommy（阮民安）前日攜囝囝Caesar，返老婆張倚雯（Eva）娘家南寧擺百日宴兼補擺喜酒，Tommy說：「諗住同Eva啲鄉親父老食餐飯，我都係第一次見佢啲親戚，本身諗住得4、5圍人，點知最後開咗廿幾圍，非常高興。」他笑說很多親友封利是畀囝囝：「有個親戚好錫Eva，封咗6,600蚊人民幣利是，另一封好厚，一攞出嚟竟然係10張1蚊人民幣嘅全新銀紙，我都未見過。有個仲離譜齋畀利是封，入面冇嘢嘅，咁都過到骨，呢個幾好笑。」
改名統「治」兒「童」
Tommy透露囝囝的中文名叫治童：「佢媽咪想囝囝有個日本嘅名，因為佢呢幾年喺日本做Model，最後咪揀咗『治』字，『童』字係希望佢永遠有童真，有『統治兒童』嘅意思，做男仔要硬淨啲唔好畀人蝦，亦唔好蝦人。」他笑言囝囝出世第一時間去辦理護照及回鄉證件，因為Eva今個月要到日本工作，她是餵全母乳，所以囝囝一定要跟身。昨晚他們一家三口返港，撞正8號風球，但他不擔心影響行程：「今次我哋醒目，因為揀咗搭高鐵，打風應該唔受影響。」
Kasa做爸爸 Alan求婚成功
而已婚的Kasa（郁禮賢）下月也榮升爸爸，B女將出世，他在網上分享老婆的大肚寫真。Alan（林詠倫）則在社交網報喜，指月前求婚成功，並上載攬住未婚妻的溫馨照，他笑說：「唔係宣布結婚，只係放閃啫！我咁多年都畀唔到咩佢，放張相畀個安心佢啫！（幾時結？）計劃年幾兩年後。」Alan分享求婚過程：「嗰日我哋行過首飾店，見對戒指幾靚，又有條鏈嘅鏈墜係A字，買完我同女朋友話我都到適婚年齡，依家事業都幾好，E-Kids將會再開演唱會，25號就拍新歌MV，我間跳舞學校又發展得幾好，如果呢幾年冇穿冇爛就結婚。」
文：音樂組