祖兒33℃ BBQ作嘔見暈疑中暑
天后容祖兒前日與近300位歌迷舉行BBQ派對，提早為6月16日牛一的她慶生，烈日當空高溫33度在戶外BBQ，搞到壽星女都疑似中暑「熱到暈」，即將37歲的祖兒又自嘲已是「中上女」，但仍保持着一份好奇的「少女心」。
本周五正日生辰的祖兒表示因要與幾百歌迷一齊聚會，加上自己喜歡BBQ，故在剛過去的周日特別與300名歌迷BBQ預祝生日，卻未料到當日氣溫高達33度，她說：「我已經係唔怕熱嘅人，但嗰日真係差啲中暑，當時同歌迷玩緊『超級無敵大電視』遊戲，真係太熱啦，我同歌迷講覺得想嘔又想暈。」疑似中暑的祖兒走入冷氣房休息，並自嘲在幾百歌迷面前好瘀、好失禮。但其實歌迷們替祖兒擔心，更提議不如提早結束活動。
「囉唆阿媽」提飲水
祖兒得悉歌迷說要「散水」讓她休息，即時跑出房外，並發揮小宇宙要撐下去，她說：「歌迷咁辛苦唔怕熱都嚟到，只係玩咗個遊戲就走，合照都未影一張，梗係唔得啦！」其後祖兒和歌迷影大合照時，問是否逐個影合照？歌迷好窩心怕她辛苦，自動要求分組影，祖兒感動說：「我Feel到好多人都擔心我，個個阿媽上身，係咁叫我飲多啲水，歌迷變晒『囉唆阿媽』。雖然疑似中暑有小小美中不足，但有時就係唔完美，先會更難忘。呢次『火中送炭』太熱，下次生日會都係搵個有冷氣地方好啲。」
37歲自封「中上女」
除有Miffy生日蛋糕，現場亦有切燒豬儀式，祖兒稱由頭切到尾先好意頭。至於即將踏入37歲的「中女」階段，祖兒笑道：「中女？仲係叫中女？大家對我都好仁慈啦，我呢啲係『中上女』喇，咁年齡係唔會停嘅，但心態就Keep住一份好奇嘅少女心。」講到生日願望，祖兒想體驗一個人旅行的滋味。問到何時嫁人？她笑說：「得啦，我有分數啦！」
文：音樂組