C AllStar「孖叉」出鞘兄弟內訌 搞散頭家

實行曲線示威

人夾人緣，查實四子性格迥異，當初做新人時，根本冇乜資格去嫌棄對方，你想出聲？留番啖氣暖肚啦！大家都係咁高咁大咋！直到事業逐漸穩步上揚，以前覺得可以啃得落嘅，家陣就會覺得不吐不快，事實上佢哋近幾年喺鏡頭後都懶得交流，就算喺後台得閒到「放蚊」，都唔會圍埋吹水防口氣！當中兩位成員釗峰（梁釗峰）同On仔（陳健安）嘅暗鬥，由地下搬埋去地面！釗峰恃住自己係主音，乜都要做大佬話晒事；On仔就覺得受粉絲歡迎，自問論唱功唔會輸，冇理由長期做阿二要睇人面色，自此兩個男人就好似啲女咁，乜都要爭，爭出位、爭歌、爭排頭，有時o架起上嚟，連錄音室都照開片，勞氣傷肝事小，失威冇面事大！

經理人諗住出碟時，每人都有首獨唱歌就可以平息干戈，點知都係收唔到科，其餘兩個成員King（吳崇銘）同Jase（何建曦）就得剝花生。一向唔鍾意玩埋堆嘅釗峰，近年都開始為自己未來鋪路大打公關牌，同DJ打晒交道，逢局必到求人緣，收到風嘅On仔就好唔抵得，話不屑身為音樂人變「天下第一關」，佢仲睇準釗峰身形輸蝕，走去狂做gym谷大隻，無時無刻騷肌，擺明曲線向人示威。

留番啖氣唱歌

C AllStar近年「三日一小叉，五日一大叉」，經理人都明知紙包唔住火，與其日日家嘈屋閉搞到家醜外傳先玩拆夥，不如趁啲火未燒通頂，好嚟好去又好，安撫吓粉絲又好，陰謀論啲臨尾賺埋最後一筆亦好，決定開告別演唱會，仲開埋綠燈畀佢哋明鬥，好似影演唱會海報時，今次就各有不同走Free Style，冇肌賣嘅釗峰、King同Jase要包到實，只得操肌有成嘅On仔露出麒麟臂，令三位忍唔住寸爆On仔扮「步驚雲」。

On仔諗住成功爭取唯一一個可以喺演唱會個人solo當攞番個彩，喺民選投票活動中，拍個搽油、半裸，仲搵埋Super Girls成員Cheronna上床嘅新歌MV搶票，硬撼搵廖子妤做MV女主角嘅「死敵」釗峰，點知就差嗰一票飲恨輸畀冷門黑面王Jase，當堂氣頂到上頸。雖有粉絲為On仔出頭，話有幕後黑手挫On仔，搞到四幫支持者又拗一餐！贏咗場交，輸咗個家，與其日日諗計鬥氣，不如留番啖氣唱歌好過啦！口舌之爭畀你贏咗又點，凡事睇長線，依家玩解體，個天都畀埋機會你，咪放長雙眼睇吓大家單飛有幾掂囉！邊個單飛飛得掂，真正出人頭地，咁先至係大贏家！

Nuts哥