唐詩詠日前拍劇期間暈倒送院，昨日她又在酷熱天氣下為新劇拍外景，詩詠坦言會記得飲水免朋友擔心，問是否包括舊愛洪永城？她不肯正面回答。

藝人唐詩詠及張彥博昨日到筲箕灣為無綫劇集《棟仁的時光》開工，扮演救護員的兩人奉召拯救手臂夾在坑渠的市民，昨日室外天氣又熱又焗，日前拍劇暈倒的詩詠說：「我好番好多，劇組畀我休息一日，尋日開番工，依家開工會飲多啲水同記得食嘢，以防再暈！（拍得好辛苦？）可能之前拍咗場淋雨戲，加上撞正女仔唔舒服嘅日子先至暈，劇中有好多要拎住張幾重嘅擔架床戲份。另外開工幾密，一星期七日，拍到7月尾至完！」

問到舊愛洪永城有否送上問候？詩詠說：「好多朋友都有問候我，冇辦法一一回覆。（有覆到洪永城？）總之所有人我都會話佢哋聽，冇話到就睇我instagram，就知我冇事喇，大家唔使擔心！其實我暈嗰陣，聽到救護員不停同我講嘢，令我覺得好溫暖，我會做好呢齣劇，等大家知佢哋嘅辛苦！」

而張彥博對於曾以螢幕情侶檔示人的劉佩玥（Moon）與周志文傳緋聞，他說：「係咩？等我問吓佢先！我同阿Moon平時有聯絡，夾吓歌。（感覺阿Moon近日春風滿面？）冇留意，等我打畀佢問吓！」對於無綫將開拍另一齣以救護員為題材的新劇，他說：「嗰套劇我都有份演，嗰套熱血啲，同《棟仁的時光》好唔同，唔擔心觀眾混淆。」

文：影視組