藝人歐陽震華（Bobby）與許紹雄這對活寶貝，昨日於酷熱天氣下為無綫新劇開工，雖然穿上厚戲服搞到身水身汗，但仍有心情講笑，互寸老之餘，又講有味笑話，認真「敬業樂業」！

Bobby與許紹雄、陳嘉寶等昨日為無綫新劇《誇世代》拍攝一場翻車戲，劇情指許紹雄誤以為Bobby翻車即衝前了解，惟昨日氣溫高達攝氏卅多度，酷熱天氣下還要穿厚戲服，眾人汗水長流，許紹雄更不停拿紙抹汗。

Bobby受訪時大講有味笑話「解暑」：「我諗起一句成語！」許紹雄即說：「哦，老漢呀！知你講乜，前輩真係前輩。」Bobby跟住說：「唔係推車嚟做乜，大師兄！」談到在酷熱天氣下開工，Bobby直言不及許紹雄辛苦：「佢今朝收04、05，但呢度call time係0530喎！今晚就到我喇，收28（即凌晨4點），但未睇再開幾點，唔想影響今日演出。」許紹雄表示連沖涼也不夠時間，惟有在車上「食散餐叉電」小休。

有中暑前科的Bobby，會否擔心再度中招？他說：「都真係經常中，熱少少就會將中暑掛喺口唇邊，所以最緊要係飲多啲水。（劇組有冇特別照顧你？）有啊，真係特別照顧，佢哋話拍到8月尾就收工，可以休息吓！其實有幾辛苦，相比古裝真係蚊髀同牛髀，我哋算好幸福，我冇乜信仰都要感恩！」Bobby身上的黑色衫非常吸熱，他已除下兩件衫，不像許紹雄穿夾棉外套戲服那麼辛苦！

至於身穿連戲冷衫的嘉寶表示，已黐了退熱貼降溫，談到婚禮進度，已交由Wedding Planner幫手，會行傳統路線，總之尊重雙方家長為太前提。

文：影視組