楊采妮剪短髮最怕拮親孖仔
「玉女掌門人」楊采妮3月在新加坡早產誕下一對孖仔，本身也是早產嬰的她感同身受，寸步不離悉心照顧。昨日是她產後首度來港出席活動，為囝囝特別剪了一頭清爽短髮，榮升人母的她胖了一點，但不減玉女風采！
43歲的楊采妮（Charlie）與丈夫邱韶智造人成功，3月在新加坡誕下孖仔，哥哥取名Ignatius，弟弟名叫Aloysius，乳名則為謙謙及暢暢。一直專心湊B的她昨日是產後首度現身，出席珠寶品牌CHAUMET「始於1780年的珠寶藝術」展覽活動，她穿露背紅色長裙示人，佩戴近800萬珠寶首飾。剪了一頭短髮的她自言擔心長髮拮到囝囝，於是剪掉。首次離開兒子的Charlie直言在飛機上不停看囝囝的照片，又分享當媽媽的心情：「當小朋友喺肚度踢你，就感覺到自己真係做媽媽。我冇兄弟姊妹，照顧小朋友好多嘢由零開始，我先生都一齊照顧，佢掃風仲叻過我。佢以返工為主，每次產檢都陪住我，所以好感激，成個過程好開心！」
珠寶留畀未來新抱
Charlie表示自己有儲珠寶習慣，笑言會將珍藏留給未來新抱，又指現在已懂得分辨兩子：「開頭認唔到，後來發現佢哋眼神表達方式唔同，相處耐咗就知分別。（餵人奶要餵兩個，會唔會好吃力？）其實餵人奶對佢哋係健康，因為孖胎好易早產，我自己都係早產，要決心去餵。」她笑言囝囝出世後，多位姊妹爭相做契媽，現時已經有三位「自動契媽」：李心潔、梁詠琪和許茹芸，她又感謝同樣有孖胎的心潔分享育兒心得，並轉贈BB衫。
蘇麗珊讚男友有心思
同場有藝人蘇麗珊，問到男友有否送首飾給她？她說：「佢有時會送啲手造禮物畀我，覺得佢幾有心思。我唔太鍾意名貴嘢，我只係送遊戲機畀佢，實用最緊要。」而林俊賢女兒林鈺洧表示父親節會探爸爸班：「我一早同佢講咗，費事到時嚇親佢。（送咩禮物畀爸爸？）會送首飾，希望佢日日戴住。（幾耐冇見？）成年幾冇見，送首飾箍住佢。」
文：名人組