今年4月誕下愛女的歌手吳若希，自爆遭網友辱罵女兒外表及批評她未婚生女！護女心切的她爆Seed反擊，揚言：「我真係會同你死過！」男友Alex亦聲援指會盡力保護兩母女，即使吳若希有公主病及講粗口，一樣照愛！
吳若希於4月底為澳門闊少男友Alex誕下B女Giselle（乳名：淼淼），為低調一直未有讓淼淼容貌曝光，豈料日前其友人上載淼淼的正面相，最終令吳若希也「跪低」晒全家褔，並指摘該友人洩密。事件仍未告一段落，不少惡意留言令她與網友掀罵戰！吳若希前晚在社交網上載被網友人身攻擊的留言截圖，內容不單批評淼淼樣貌，又指吳若希「爛口」及批評她未婚生女！
吳若希留言反擊：「我個女，呢世都係我個女，我冇得揀，我個女都冇得揀，作為媽媽永遠希望將最好畀子女，我唔想佢喺成長過程因媽咪嘅身份被鍵盤戰士攻擊。但係我話你知，如果有人傷害我個女～我真係會同你死過～理得你乜嘢公眾人物～我做人阿媽連個女都保護唔到～我不如唔好生？！」
她獲大批網民及好友如許廷鏗及胡鴻鈞支持。其男友Alex亦忍不住在社交網發炮：「就算我們嘅囡大個咗係點樣，她始終係我哋世界入面最perfect！」同時發表愛的宣言：「就算我個女，我老婆有幾任性，公主病。講粗口又點！咁又點？我鍾意呀！我愛呀！我會用盡所有方法保護他們！請那些所謂黑粉，三思而後行！」
文：專案組