馮盈盈劉穎鏇上下失守蝦碌教儀態
香港小姐馮盈盈及劉穎鏇前晚出席港姐招募行動，雙雙在台上接受考驗，但她們示範儀態時竟齊齊走光，非常蝦碌！
2016年港姐馮盈盈、劉穎鏇、陳雅思及張寶兒，前晚到銅鑼灣出席「TVB 50年 香港小姐 美麗是贏家 招募行動」，眾女接受以露臍晒腹肌西裝Look示人的師姐陳庭欣考驗，結果盈盈示範行路儀態時，露出「缽仔糕」，劉穎鏇坐低時又走光，認真蝦碌！
提名同學參選
盈盈向未來師妹大送貼士，她說：「一定要食飽飯至面試，同埋記得帶外套，因為港姐面試時間長，肚餓會影響表現。（有冇提名朋友參選？）我讀戲劇班有個同學想參加，但我唔可以開佢名，怕報道出咗嚟，佢有壓力唔選，怪我！（叫讀書同學參選？）冇，佢哋好多都出咗嚟做嘢啦！」
楊明緋聞纏身
而幫手招募靚女的藝人楊明，澄清近日與藝人郭千瑜及無綫前藝人殷櫻的緋聞，他說：「我唔覺得合照或者拍劇未埋位時傾吓偈，會構成咩第三者、小三，如果因為咁而出現咗呢啲報道，我會覺得對我啲朋友、同事好唔好意思。（女友莊思明有冇唔開心？）佢都係得啖笑，佢知呢行會被人咁寫。」
文：影視組