黃紫盈撈過界關公賣酒

前無綫新聞主播黃紫盈（Connie）除做主持，近日更創業殺入商界以六位數字賣酒，她表示向來送禮物都愛以分享為主：「因為依家大家開Party都好鍾意飲酒，大家口味都鍾意得意嘅，所以就同朋友一拍即合，創立呢盤生意。」Connie坦言現時主力做網上生意，希望做出口碑，現時亦深受歡迎，不時缺貨。

加價？有商有量！

問到Connie是否飲得之人？她說：「我係好容易面紅，我飲唔飲酒都好易面紅，但未試過飲醉，因為我飲少少已經血氣運行得好快，好似關公咁嘅樣，所以喺出面街我盡量好少，但慢慢飲其實我都OK飲得（口架）！」除做老闆外，Connie自由身工作已有三年多時間，問到有否每年加價？她說：「大部分都好好，最緊要大家有商有量。（有冇不快事情？）咁又冇，如果有我就好快唔記得。」談到2017年大計，她希望可以擔任配音工作：「我中學就係做配音，嗰陣都幾鍾意，反而做咗幕前就少咗，依家都想配卡通片或電影配音，係我幾想試吓。」

黃紫盈自言「慢慢飲」都算「飲得」！

黃紫盈親力親為打理呢盤生意！

文：專案組

攝：司徒國榮

場地：Queens Wine