袁文傑儲老婆本向女友撒嬌
袁文傑前晚與女友張潔蓮（Jackeline）出席首映禮，同場有顏子菲、麥長青及歐錦棠等。袁文傑因劇集《不懂撒嬌的女人》中「游生」一角而人氣急升，但仍不怕得失女粉絲，拖實女友拍拖出活動放閃，問到是否努力儲「老婆本」？懂撒嬌的男人即反問女友：「我係咪好努力呀？」逗得對方尷尬甜笑。他又說：「仲未有落實嘅部署。（儲首期先？）都儲吓先，同女友都低調，但張文慈同陳啟泰聯絡我話記得早啲通知佢哋，到時婚禮要做MC，會寫定稿畀我睇！」而Jackeline被問到男友忙工作有否遭冷落？她冧笑搖頭表示不會。
感謝球迷欣賞
問二人是否已慶祝端午節？袁文傑笑說：「我今日糉都未食，忙做訪問，多謝大家咁錫我。好多工作進行中，將會同港男丁子朗、林韋辰拍自己首個綜藝節目《玩轉香港日與夜》。（球迷讚你講波中肯！）多謝大家欣賞，我都係講吓感想。」
顏子菲係張衞健親戚
而顏子菲則性感亮相，她透露剛從上海返港。現時自由身的子菲被問到會否想加入TVB？她說：「好多亞視朋友加入都有好發展，有朋友同張衞健拍緊《大帥哥》，我都恨同佢合作。（叫舊同事牽線？）唔使，其實Dicky係我表姑丈。（叫佢幫你開口？）佢好忙o架，希望有機會可以探吓Dicky班，向佢偷師！」
文：影視組