吳若希囡囡單眼皮似老竇
於4月底誕下囡囡淼淼的吳若希（Jinny）現正全力照顧女兒，雖然湊B相當辛苦，但一向有鋪「分享癮」的她卻不時上載囡囡的側面及腳仔相，而淼淼公主的真面目終於在昨日意外全面曝光。Jinny更跟本報多分享兩張囡囡靚相，雖然B女人仔細細，卻經常擺出一副沉思的樣子，相當可愛!
現年25歲的歌手吳若希於4月23日誕下囡囡淼淼後，一直停工休養及忙着照顧囡囡，而活躍於社交平台的Jinny近月來都以「唧牙膏」式將愛女的可愛照片斬件上，可惜只得淼淼的側臉同腳仔相，無緣一窺淼淼全貌。不過，今次淼淼公主的真面目終於曝光，事緣昨日Jinny一位友人將淼淼的正面大頭照上載於Instagram，更留言寫道：「Hi!淼淼寶寶，啲腳趾一粒粒好似提子，個下巴仔嗰幾摺肉真係不得了，手長腳長似晒Daddy、Mammy。」原來淼淼擁有一張啤梨面，眼仔細細兼單眼皮但精靈，似足爸爸Alex。不過這批相片其後刪除了。
大食妹好得意
昨日幸福媽媽Jinny事後接受電話訪問時，表示囡囡是大食妹：「阿B依家就5 kg，我覺得好得意，可能每一位媽媽都覺得自己個女最得意。」但她直言在網上看見囡囡的正面相有點不悅，因為自己想保護囡囡，不想囡囡樣貌曝光，皆因身為藝人深明在公眾眼光下成長相當大壓力，又指到訪她家及探囡囡的全是自己及Alex的朋友，可惜現在曝光了都沒有辦法，亦都相信對方是無心之失。
「希望大啲似我多啲」
既然囡囡相貌已曝光，Jinny亦不介意，還跟本報分享了兩張囡囡靚相，雖然人仔細細，卻表情多多，經常裝出一副沉思的樣子，相當趣致！Jinny指囡囡似十足爸爸Alex餅印，並笑說：「但我又覺得阿B面形同嘴仔似我，希望佢再大啲嗰時，眼會大啲似我多啲。」問到何時會復出？Jinny指現時已經努力做運動和打拳，將於7月出席活動，希望屆時以最正常及最Fit狀態示人。
文：音樂組