黎明詩無悔出櫃父親撐開心就得！

52歲黎明詩（Stephanie）自98年婚後退出樂壇，可惜婚姻不如人意，日前在公開場合首認「出櫃」，視Kelly為心目中「另一半」，至於其銀行家丈夫Eric Fung已分居及辦離婚手續。Stephanie昨日受訪對在傳媒前勇敢認愛成全城焦點，她說：「冇諗過成為焦點，好隨意，你哋問到又覺得可以講，又唔係做壞事，過咗某個年紀，想做番啲自己想做嘅事。」

相識是緣分

Stephanie指與Kelly走在一起是緣分，二人早在30年前於英國相識，年多前才在港重遇：「最緊要溝通到，大家好夾，Kelly好鍾意聽歌。（佢仲聽緊你唱嘅歌？）係，我都問佢做乜成日聽。」問到Kelly有否感意外？她笑說：「佢估唔到，冇人估到，我自己都估唔到，真係神差鬼使，朋友笑我係咪食咗誠實豆沙包。」而問到衝動認「出櫃」有否後悔？她答得爽快：「我冇後悔，講咗就講咗，我哋都好出o架啦，出咗做乜要後悔！我啲朋友都知道晒！家人、朋友都戥我開心。」對於有傳其家人反對她與同性交往，Stephanie則指最開心是家人看到報道後反應：「佢哋好支持，估唔到，因為屋企人之前估估吓，聽聞過但冇問我，我爹哋睇《東方日報》，佢一睇到就話好開心，只要我開心就得，唔使理人哋點睇。」

與Eric和平分開

問法律上身份仍是老公的Eric，可有因她出櫃感尷尬？Stephanie說：「佢冇乜嘢，放下咗，我哋好和平分開。我哋係親人咁，有食飯見面。（佢有女朋友未？）我唔知亦唔會問。」談到與Eric沒小朋友少個顧慮，她直言曾想過生BB但不成功，可能與對方注定沒子女緣。Stephanie自爆在Kelly之前有人追求，她卻沒接受：「唔係男定女問題，係夾唔夾，亦唔係受刺激搵個女，絕對唔係呢個心態下決定。」

談到有同性情侶為想有下一代而借肚生B，她表示沒考慮：「小朋友要好畀心機教，依家我年紀都唔細啦。」至於若再踏歌壇Stephanie表示Kelly會支持她，最緊要開心！而她正籌備一張慈善黑膠碟與新人歌手合作，扣除開支後將捐作慈善用途。

場地：蘭桂芳粵桂樓

文：音樂組

攝：劉斌