羅家英驚喜撐場汪明荃放閃！
藝人汪明荃前晚於電視城錄影《海馬牌床褥特約：汪明荃2017金曲夜》，為其即將舉行的演唱會打響頭炮，歌手楊千嬅、王菀之及古巨基等擔任嘉賓，與汪明荃合唱多首經典金曲。老公羅家英亦驚喜亮相，更陰聲細氣叫她加油，氹得汪明荃笑到四萬咁口，恩愛非常，加上今次出動不少私伙靚衫，又準備逾400萬鑽飾登場，實行閃爆全場！
王菀之被吊嚇親
千嬅在現場放閃晒恩愛，雖然老公丁子高沒有前來撐場，不過他在千嬅日韓旅行時送驚喜：「去旅行期間係我同老公相識十周年，佢喺我唔知情下，特登遲我一日飛嚟韓國，陪我食咗個Lunch就返港，最感動係佢幫我搬咗韓國嘅戰利品返香港先，等我去到大阪再買過。」至於買甚麼禮物給老公？她表示買了一件日本品牌的T-shirt，後來才知道購入炒貨，普通一件都幾千元！而王菀之唱歌時被吊上半空，嚇到有畏高症的她向汪明荃說：「暫時唔講得嘢住……好多手汗呀！」事後她受訪表示綵排時驚到面青。古巨基則視汪明荃為偶像，又指近日忙碌，幸好太太陪在身邊，並謂將來若太太懷孕會即時公布。
