現年37歲的藝人胡杏兒早前在網上宣布有孕後，昨日首度現身公開活動，身形豐滿不少的她表示會選擇自然分娩，因復原時間較快，想爭取時間再生，起碼生兩個，認真有計劃。

胡杏兒在母親節當日於社交網站宣布懷孕後，昨日首度出席公開活動，同場還有台灣型男王陽明及宅男女神陳瀅。杏兒以粉紅色貼身連身裙上陣，貪靚的她仍腳踏三吋粗踭鞋，在祝酒儀式時則非常乖巧，滴酒不沾，不過百無禁忌用剪刀主持剪綵儀式。問是否懷孕四個月？她只說：「同你哋估計差唔多，年尾生囉，想保持神秘。（男定女？）我哋諗緊去照定係等生嘅時候先知。（順產定開刀？）希望順產，恢復得快啲。（想生多幾個？）都係，要爭取時間。如果開刀要等年幾先可以再生。（三年抱兩？）未知，如果應付到就爭取時間，起碼生兩個。」杏兒稱老爺、奶奶對胎兒性別也無所謂，反而老公想生女。

身形變得豐滿的杏兒指放假期間，肚子大了不少：「最初都佗得幾辛苦，鍾意食嘅嘢變得唔鍾意，又會突然好想食某樣嘢，都試過叫老公收工買魚蛋粉畀我。依家肥咗五磅，醫生話BB個Size係OK，我怕佢太大隻，好難生。（上圍有冇升Cup？）我冇度，但成個人都腫咗脹咗，我要買過啲褲，內衣就未有需要買過住。（怕唔怕變成『肥田』？）唔會，依家進度OK。」至於有否收到舊愛黃宗澤的祝福？她笑說：「有，你哋一問完佢，佢就Send畀我。好多朋友都有祝福我，好開心，BB好幸福。」問到之前一直不認有BB，她解釋：「因為未夠鐘。（但你嗰時唔係話唔知，係話唔係喎！）咁我答『唔知』咪即係承認咗！哎吔，我冇經驗呀，唔好意思！」

杏兒又表示現時不能接長時間工作如拍劇，出席活動及出埠就沒有問題，問到老公會否要她減少工作？她說：「工作上要問佢，要尊重佢，如果飛都要問過佢先得。（之後做全職媽咪？）未傾到，但我諗唔會完全唔做嘢。」

同場的陳瀅亦有恭喜杏兒，又表示將來想生三個小朋友，認為現時科技發達，可以考慮雪卵。問有否追求者？她說：「冇呀！我慢熱，成日等人追，依家愈大愈怕醜。」

文：名人組