黃心穎昨日以運動Bra Top谷出「心形胸」拍廣告，大騷3吋事業線及馬甲線！提到將與緋聞男友馬國明北上拍劇時，她即冧滋滋說：「順便喺裏面拍拖！」

藝人黃心穎（Jacqueline）昨日拍攝瘦身廣告，以藍色運動Bra Top谷出「心形胸」，大騷3吋事業線及馬甲線，展現健康性感。提到將與緋聞男友馬國明齊齊北上，拍攝無綫重頭劇《宮心計2深宮計》外景，她說：「尋日終於拍完香港戲份，嚟緊要執篋。（同馬國明執？）佢應該唔需要我幫佢執嘅！（互相提醒帶啲咩？）都會，我哋有個Group Chat，都驚帶漏嘢，因為個半月入面唔知有冇得返落嚟！」記者笑指其他人北上拍劇，他們則北上拍拖，似乎公私不分，她即冧滋滋說：「我係去拍劇嘅，順便喺裏面拍拖，因為劇入邊係一對！（戲內戲外都一對？）戲內係，戲外未知！」

談到瘦身，心穎表示自己冬天最瘦、夏天最肥，期望打破這個宿命：「今年想着Bikini着得好睇！（着畀馬國明睇？）着畀自己睇！」問到對方喜歡她肥還是瘦？她說：「我唔知佢鍾意我肥啲定瘦啲，但知佢In General係鍾意人有肉地！（唔怪得佢咁鍾意你！）所以佢依家變咗唔鍾意我！」又表示會趁公餘時間做運動，想同時擁有事業線及馬甲線。

文：影視組