洪卓立Plan定旅行秘婚
歌手洪卓立（Ken）日前亮相TVB娛樂新聞台節目《StarTalk》，大談與女友湯怡拍拖十年感受：「關係同結婚冇分別，會結婚但未知幾時，對我哋嚟講唔係一件急切嘅事。到時應該會旅行結婚，因為大家太鍾意旅行同低調，結完食到好似隻豬返嚟先話畀大家知。」
問到入行十年有何憾事，Ken表示：「婆婆住喺深圳，幾年前我喺廣州有個活動會唱幾首歌，婆婆話想嚟睇，但我覺得老人家要搭咁耐車聽我唱幾首歌好無謂，所以我拒絕咗。點知唱嗰晚婆婆已經入院，第二日走咗，件事影響我好深同打擊好大，好後悔。有啲嘢你以為有下次，但原來話走就走。」
