克勤出口幫梁榮忠搞關係返無綫
歌手李克勤昨日返母校華仁書院，與梁榮忠為無綫節目《李克勤30周年演唱會校園Live》綵排，克勤自爆點名要無綫讓梁榮忠做主持：「梁榮忠好耐冇喺無綫出現，我同無綫中層人士講，要梁榮忠做主持，佢哋滴住汗話要問吓先，我打電話畀高層余詠珊，後尾佢覆我OK！（你幫梁榮忠打通關係？）我打通咗個電話啫，其實佢冇嘢，我哋誤會咗喇！」
克勤又指為演唱會犧牲：「本來我今年應該去澳洲睇一個世界級嘅羽毛球賽，依家忙演唱會去唔到。（叫太太代你去？）其實係中國女子羽毛球運動員趙芸蕾同我太太聯絡，邀請我哋去澳洲睇比賽，依家去唔到，惟有喺香港幫佢哋打氣！」
合作25周年
梁榮忠則親自拆解在TVB失蹤之謎，他說：「其實我去咗做旅遊達人，我想好似80年代嗰啲去法國寫劇本嘅編劇咁，我呢度去、嗰度去寫劇本。（感激克勤點名令你重返TVB？）其實今年係我同克勤合作25周年，只要係『克勤』呢個名，我都會到！」
