無綫藝員林秀怡捱足九年，努力慳錢養家，靠藝人朋友二手衫接濟及撈多份兼職，更曾在網上賣安全套！最近她拋全副身家與友人合資開餐廳，並親力親為做清潔及樓面工作，十分忙碌！

無綫劇《不懂撒嬌的女人》中多位演員均演出搶眼，當中飾演唐詩詠閨蜜的林秀怡，與孫慧雪及鄧佩儀負責搞搞震令劇情輕鬆不少，其麻甩男仔頭角色獲網民大讚自然又搞笑。25歲的秀怡已入行9年，一直默默耕耘收入雖不算多，但甚有計劃的她多年來勁慳儲錢，兩個月前與友人在旺角女人街開餐廳，秀怡投資全副身家共六位數，她笑言是破釜沉舟，目標三年內回本。由於沒多餘錢請人，她在拍劇期間返餐廳洗碗，平日要兼顧清潔及樓面工作，兩邊走非常忙碌。

由入行頭幾年月薪不足七千港元，到現時約九千元，身為家中經濟支柱的秀怡要供養媽咪，只好慳自己不敢亂買嘢，更試過減肥減到暈！她說：「我性格男仔頭，比較少買衫，好多謝朋友送啲二手衫、化妝品，好似趙希洛、蔚雨芯都幫過我，之前我試過上網賣安全套搵錢，喺第二度拎啲貨返嚟賣，但就唔使見面交收嘅。」年前秀怡曾被偷拍在食肆兼職做傳菜，她直言感尷尬：「以前唔知人哋點睇，點解藝人會去做傳菜？依家面皮厚咗，會同啲客傾偈！」

個性開朗的秀怡樂觀面對星途，直言從小熱愛演戲，會繼續等待有發揮的角色，但回想年前低潮期，生活壓力加上對前景迷惘，她曾多次半夜偷泣：「嗰陣成日喊，但又唔可以畀媽咪知，屋企細，唯有趁沖涼時喊，搣住個鼻喊就冇乜聲，不過我樂觀底好快冇事！（媽咪有冇叫你轉行？）冇呀！媽咪好支持我追夢，我哋關係似兩姊妹！」問到如此辛苦，會否想找個男人倚靠？秀怡即Bling Bling眼笑說：「想呀！我都想人照顧吓，擇偶條件係成熟、高大、靚仔！但要肥少少，好攬啲，但依家我喺屋企係男人咁，慣咗。」

文：影視組

攝：吳文聰