何遠東自薦捐精誘Regen落疊
近期因劇集《心理追兇》而人氣急升的何遠東（東東），昨日孖住張惠雅（Regen）現身舞台劇探班，面對Dry足兩年幾又想生仔的Regen，東東豪氣指不介意捐精，更大讚對方符合其理想對象要求，細粒兼瘦削，氹得Regen心花怒放！
藝人何遠東與張惠雅昨日現身同志舞台劇《借種消愁》探班，並帶同牛鞭及鮮花送給兩位主角林耀聲及鄧智堅，貪玩的Regen更於拍照期間施爪功突襲東東胸部，並大讚他很有安全感，場面惹笑！
啱晒擇偶條件
談及舞台劇以同性戀者被父親要求有下一代的故事，當中涉及借種及代母等內容，Regen透露亦有趁機與東東討論一番。正修讀中醫的Regen表示單身了兩年多，沒有愛情滋潤：「我都想結婚生仔，想幫自己把到喜脈添！」在旁的東東即口甜舌滑狂向Regen笠高帽，更揚言不介意捐精：「I'm Ready，其實你都符合我擇偶條件，矮過我同瘦過我，我又鍾意打理家頭細務，你又咁『呢啡』。」氹到Regen笑哈哈不停。
談到早前舊拍檔張紋嘉舉行音樂會，Regen與Winkie也未有現身，再次惹來不和之說，對此Regen說：「當日Winkie喺內地做嘢，我排緊粵曲啫！大家都仲有聯絡，都知係想搞個十周年紀念演唱會，其實都要睇時間同緣分，同埋呢排開工喺廠度都有聽到東東佢哋唱HotCha以前啲歌，令到信心即刻大咗，原來真係有人聽我哋嘅歌，係有粉絲o架！」
林耀聲鄧智堅HeHe
而林耀聲與鄧智堅則即場演繹一段梳化纏綿戲份，問到二人可感尷尬？林耀聲說：「之前喺電影、廣告同短片都演過同志，今次舞台劇就係第一次，冇乜嘢，係同鄧志堅演有少少緊張，因為現實生活佢係我老師，排嗰時會緊張到講唔到對白。」
文：影視組