張曦雯考潛水牌 睡魔急Call
「打機女神」張曦雯即將再為無綫節目勇闖水底世界！備戰考潛水牌的她，最近除上速成班落海深潛外，更要上理論堂準備筆試，但她自爆因連續上4、5小時而瞌眼瞓，甚至落水聽講解時亦幾乎瞓着，笑言自己是壞學生！
華姐冠軍出身的張曦雯（Kelly）除了鍾情打機外，亦熱愛水上活動，更因之前到馬爾代夫拍攝無綫J2旅遊節目《3日2夜》而愛上潛水。將於本月16日再為《3》到毛里裘斯探索水底奧秘的她，最近以考潛水牌為目標參加密集式速成班！除了落泳池及落海實戰外，她還為通過筆試而上潛水理論課：「每堂上4、5個鐘，幾辛苦，好耐冇返過學，所以上堂真係會瞌眼瞓！落水嗰時阿Sir講嘢，我都差啲瞓着！我係壞學生，哈哈！」
考教練牌鋪後路
問到會否挑戰自己考教練牌？正在考初級證書的她說：「考完呢個之後仲有Advanced證書，考晒先可以考教練牌。之前去馬爾代夫同啲教練傾偈，原來佢哋喺度假勝地係包食包住，如果我冇做依家份工，去考教練都幾唔錯。」
Wetsuit同樣性感
談到之前她在《3》常以泳衣上陣，搞到一眾宅男鼻血直流，問今次會否同樣「重裝」應戰？她說：「今次好多水上活動，所以會帶5、6套泳衣，但其實唔一定要着比堅尼先好睇嘅，着潛水Wetsuit都可以好型、好性感！」
文：影視組