生前廣結良緣 靈堂成花海 別了，曾守明！
早前猝逝的資深藝員曾守明昨日在世界殯儀館設靈，生前人緣極佳的他獲不少好友前來致意及送花牌。好友歐瑞偉雖然已平復心情，但講到同行工作的曾守明突然離開又一度眼濕濕。至於協助曾太處理守明後事的袁潔儀，亦有感人生無常，應盡早準備。
無綫資深藝員曾守明早前在廣州登台時突然暈倒猝逝，終年58歲，昨日在世界殯儀館以維新教形式設靈，定於今日大殮並送往哥連臣角火葬場火化。靈堂放有其劇集造型照，生前人緣極佳的守明獲一眾藝員同事如黎耀祥、胡杏兒、唐詩詠、張兆輝，以及電視廣播有限公司和演藝人協會等送花牌致意，曾任輔警的他又獲牛頭角警署、皇家香港軍團等單位送花牌悼念。
遺孀：我為佢驕傲
遺孀邱淑芬偕兒子曾忠燁受訪，她對各方好友的協助感激不盡：「特別係袁潔儀，佢幫我喺公安方面辦理手續，又奔跑咗好多個地方，呢樣嘢係守明積出嚟嘅福。喺屋企執嘢勾起好多回憶，我為佢而驕傲，今日好多花牌，佢人緣唔錯。（守明有遺願？）佢有好多嘢想做，又想囝囝入紀律部隊，又鍾意做公益，佢比較喜歡熱鬧氣氛及環境。（經濟上冇問題？）冇，我有返工嘅。」
事發當日與守明一同到內地登台的歐瑞偉亦有前來致意，他指鄭家生因生日而未能到場。他表示已平復心情，但提到守明未能一同回港時，一度感觸眼濕濕：「佢係位好好嘅同事、好好朋友，一直好照顧後輩。大家識咗30年，為人唔錯，今日好多人嚟送佢，就知佢為人係點。睇住佢出事，所有嘢就喺一分鐘之間，唔知點形容。」
袁潔儀哀悼亡友
協助曾太處理守明後事的袁潔儀亦有出席喪禮，指事件令她很感觸：「呢一、兩年入番娛樂圈，眼見朋友一個個咁走，走得開心舒服都係好事，但留喺人世嘅親人就要承受突然失去親人嘅痛苦，懷念住心愛嘅人先最辛苦。我諗緊老公，我哋又冇小朋友，啲人會話大吉利是，但我又覺得唔係，真係需要編排好後事，因為真係唔知有咩事會發生，要令到身邊人知自己心意，有個方向。」
文：影視組