林文龍笑宣萱冇身材

藝人林文龍及宣萱昨日到電台接受薛家燕的節目訪問,宣傳新劇《不懂撒嬌的女人》,期間二人互寸,大放笑彈。提到宣萱指如劇集有30點收視就叫林文龍穿泳褲,林文龍即說:「我哋唔係賣呢啲,可能佢係嗰個年代,你有本錢咪騷少少畀人睇,我就冇本錢。」問到二人拍劇時是否都經常鬥嘴?宣萱笑說:「初時都有半點尊重,依家一點尊重都冇。」對於劇集口碑好,林文龍指老婆郭可盈及囡囡都有睇,但講到劇中不少女演員騷胸,宣萱即踢爆他有望:「未Roll機有睇,Roll咗機又睇。」林文龍反寸她胸細:「佢直情渣,因為未見過咁嘅Size嘅嘢。」問到林文龍平時可有撩女演員?宣萱大爆:「平時就唔夠膽嘅,但睇唔到就唔知。」林文龍聽罷即刻不敢出聲。