掌聲大 名氣小 何遠東小腩肉大作戰

俄國戲劇大師史坦尼斯拉夫斯基講過：「沒有小角色，只有小演員！」雖然何遠東喺《心》劇只佔大約五集戲，比起同劇蔡思貝，何遠東嘅出場可謂少得可憐，但係佢嘅好戲光芒，偏偏贏足九條街！就算所演嘅角色係變態，依然成功俘虜萬千師奶，成新一代師奶殺手。雖然冇人知觀眾對何遠東呢一刻嘅欣賞，可以維持到幾時，正如佢上年喺《巨輪II》都有過一輪唔錯人氣，一樣有落區同市民互動，一樣有街坊畀like讚好戲，咁又點呢？正如佢都深知：「肥仔或者肥人，做演藝行業，點會紅？大紅大紫呢四個字，唔會出現喺肥仔身上！」

白只橫掃頒獎禮 又係等工開

即使我Nuts哥好肯定何遠東今後都唔使點再扮棋，但佢可以好似荷里活肥仔諧星演員積碧克（Jack Black）咁，喺《金剛》之類嘅大片度孭重飛咩？No！唔係何遠東有問題，係大部分人對肥人始終有芥蒂！香港對上一個爆紅嘅肥佬一線藝人，係已故丑生王梁醒波，好多90後可能連名都未必聽過！好老實，雖然白馬王子呢類高富帥男一角色未必輪到肥仔藝人做，但唔少發揮性高如變態或奸角，一線男星唔吼啫，反而令班好戲肥人執到好籌兼上位！香港係從來不缺好戲嘅肥仔藝人，舊年香港電影金像獎最佳男配角、最佳新演員得主白只，前年《萬千星輝頒獎典禮》最佳男配角韋家雄，加埋何遠東，都係眼細細、肥嘟嘟、經常被派演小角色嘅好戲小腩肉，真係可以並稱港女、OL至愛：「腩肉三小！」

先講白只，大部分人對佢最深印象都係「同顏卓靈拍拖」，事實上白只將電影《踏血尋梅》個變態角色演得入木三分，單睇佢落口供一場戲已經抵佢攞獎，何況佢仲加送變態鎅手放血打手槍？照計佢攞完金馬獎、金像獎後，理應有唔少人搵佢拍戲，但Nuts哥問親佢忙乜？佢次次都答：「冇人搵！」佢又冇講大話，事關直至近排佢先至有新作，係同佢隊組合朱凌凌自編自導自演嘅電視劇，比起同樣係最佳新演員嘅小鮮肉蔡瀚億，攞獎後片約不斷，仲做埋男一，有得同馬來西亞宅男女神林明禎大銀幕上談人鬼戀，白只掌聲背後真係充滿悲歌！

韋家雄寧公廁打工 唔拉關係

同樣可歌可泣仲有韋家雄，早排佢喺港鐵挺身而出阻止一位中年男偷拍外籍女乘客，贏得網友一陣掌聲，但掌聲過後呢？講得好聽係回歸平淡，唔好聽係視作透明，靜靜去等下一次掌聲，呢個彷彿就係肥男嘅宿命，不過家雄同Nuts哥講過，出道做過亞視劇集男一，之後被掟去做二打六嘅佢，當年情願去公廁換香精，都唔想靠名編審阿哥、拍過唔少神劇如《大時代》等嘅韋家輝嘅關係抓戲拍，難怪前年佢憑《梟雄》攞男配嗰刻咁激動！因為不論何遠東、白只定韋家雄，觀眾並唔會吝嗇對佢哋報以零成本嘅一時掌聲，但要港女擺酒宴客，餐餐都食「腩肉三小」？佢哋身體會很誠實咁揀番日系韓式小鮮肉，始終「肥仔，條演藝路好Tough o架！加油啊，腩肉三小！」

Nuts哥