林盛斌讚B仔腳頭好
藝人林盛斌（Bob）配音的荷里活動畫片上映至今票房貼近4,000萬港元，昨日他現身戲院謝票，對於被指是「運財童子」，他大讚太太腹中胎兒腳頭好：「呢排人逢喜事精神爽，我自己接咗一、兩個代言家庭用品廣告，自己公司又傾到大生意，希望keep住呢股氣勢。」
雖然收入不錯，但Bob知慳識儉，表明無意換大屋：「可能等BB出世後有少少裝修，三個家姐之前用啲嘢送咗畀人，會喺朋友度攞番嚟用，仲睇吓大家有冇啲用過但好潮嘅服裝啱我個仔，叫佢哋送畀我，開心share嘛！」他又指正計劃暑假時送大女及二女往美國親戚家度假。