周柏豪紅館主場趕「富婆Sa」落台
入行10周年的周柏豪再踏紅館開騷，獲大批圈中好友撐場，尾場演出邀得老友蔡卓妍（阿Sa）任嘉賓。他大爆阿Sa數口精，是圈中小富婆，又抵死地指自己聽阿Sa唱歌長大，然後趕對方落台，激到阿Sa大叫：「去死啦！」
歌手周柏豪前晚在紅館舉行一連三場10周年演唱會《One Step Closer Pakho Live 2017》尾場，獲許廷鏗、胡鴻鈞、連詩雅、吳業坤、JW、鄭欣宜、何超蓮、AGA、Super Girls、林奕匡及未婚妻等捧場。一開場，歌迷已全部站起，現場氣氛高漲，柏豪表示準備時間太短，曾想過放棄，但見到反應熱烈就放心。
「細個聽你啲歌長大」
柏豪邀得好友阿Sa及艾粒擔任嘉賓。阿Sa以性感紅色露背長裙現身，二人合唱《一事無成》掀起全晚高潮！柏豪大讚阿Sa夠老友，阿Sa卻搞笑指是有目的：「我想宣傳我哋套戲《原諒他77次》，我計過數……」柏豪聞言即打斷她並笑言：「你梗係識計啦，娛圈小富婆。你啲珍珠我唔敢掂，賠唔起！」最後更搞笑地趕走阿Sa，指紅館是其主場，更抵死地表示自小就聽對方唱歌，激得阿Sa大叫：「去死啦！」其後柏豪再次在演唱會上大讚太太為他付出很多，去年婚禮是太太一腳踢籌備，自己卻因工作而沒時間陪她，重提婚禮前10分鐘發現傳媒而考慮是否要取消婚禮時，他一度哽咽。
押後造人大計
柏豪騷後受訪時坦言未夠喉，未來想裝備好再開騷。他表示為了操fit而戒食煎炸食物三個月，每天吃白烚雞肉、菜和少許白飯。問到老婆可有心痛，他說：「佢梗心痛啦，我媽都好心痛，佢哋最想見到我開心！」他透露太太首場有拿白烚雞肉入後台，並否認太太位置隱蔽，只是喜歡低調：「佢同朋友坐，佢想睇騷，我每日都問佢意見，但唔敢問我送畀佢嗰部分有咩感覺。佢話我比以前唱得好，個人自信咗，可能同年紀有關。」講到有大肚歌迷支持，他直言恨生B：「我同太太好鍾意小朋友，未來有計劃，但依家未有時間！蜜月都未做。（帶佢巡迴當蜜月？）有得諗喎！」另外，他昨日舉行簽唱會見歌迷，活動上大玩遊戲。
文：音樂組