家醜怕外揚 偷情有保障 白百何「隱分」啟示食出商機
我Nuts哥最喜歡睇國產愛情動作片，唔好心邪，唔係AV鹹片，係大婆上門捉姦、小三被剝光豬遊街嘅短片，拳拳到肉，腳腳到腹，有血有淚夠寫實，真係好睇過甄子丹一個打十個！前年內地官方公布有384萬對夫婦離婚，即係有成七百幾萬人離婚，以香港人口嚟計，即係成個香港撞口撞面全部都離晒婚！唔使學者分析都知，修身齊家呢類貞節忠心傳統觀念愈來愈薄弱，加上無論男定女，個個有錢就身痕，今朝有酒今朝醉，唔理咁多，食咗先講，用部手機fing兩fing就可以交友，想偷食有小三易過借火！唔怪得上個月「驚蟄」，Nuts哥經過銅鑼灣鵝頸橋時，見到大堆人喺度啪啪啪啦！原來有唔少內地人組團嚟打小人，話要打走個小三同老公！
林丹羽毛乳模俱愛
明星都係人，偷食或離婚一樣都會發生。白百何貴為內地一線女星兼百花影后，當年憑電影《失戀33天》開始人氣急升，由出道到依家，咁多部電影嘅累積票房超過63億人仔，百分百係票房女王！雖然身為人妻但係依然仙氣十足，人人都話佢演技好形象夠正面，點估到佢表面斯文內裏鬼死咁open！早排佢被人踢爆同內地小鮮肉張愛朋喺泰國玩鴛鴦戲水，攬攬錫錫都未夠，仲出埋「一陽指」起勢狂指對方下體！衰咗啦！
男人偷食係千古以嚟重複又重複嘅「食物鏈」，但係女人偷食，乜嘢水性陽花等等難聽過粗口嘅形容詞都出晒，最後陳羽凡以「前夫」身份出嚟解畫，話兩年前已同白百何各行各路，我瞞離婚了！為咗個囝囝，所以唔公布離婚！本來係洗白以脫「勾佬」嘅罪名，但因為呢兩年仲公開老公前老公後咁叫，成千上萬嘅網民狂鬧佢哋扮恩愛夫妻博好感嚟搵錢，仲鬧爆白百何就算離婚，身為公眾人物都要檢點！
內地藝人偷食例子何其多，內地男星王寶強陰功豬自爆綠帽已戴，人財兩空，老婆同經理人搞埋一堆！中國名將林丹玩開羽毛，連乳模都唔放過，又錫又攬，老婆謝杏芳公開聲援玩「愛‧回家」呢招幫手撲火！最邪嘅係，當年同白百何合演電影《失戀33天》嘅內地男星文章，都一樣偷食斷正！林丹同文章食完仲有老婆撐，揞住半邊嘴偷笑啦！
幫清理蘇州屎有錢途
林丹同文章雖然唔使離婚搞到妻離子散，所謂邊度跌低邊度起番身，佢哋可以隨時開talk，作為失敗偷食個案人辦，企出嚟分享吓經驗，自己衰咗啫！仲有千千萬萬個男人身痕，造福吓「後人」醒吓啲貼士過兩招，真係令人「食」得安心又開心！至於王寶強更加可以出書《男人最痛》系列，抒發吓內心鬱結之餘，又可以提醒吓啲兄弟，應該點防妻偷食，唔使搞到財色兼失！
畀老婆發現偷食，一哭二鬧三離婚嘅話，搞到要分身家，都咪話唔頭痕！依家內地開始有人搞「小三勸退師」呢門創意工業，成功偷食完冇手尾跟嘅文章同林丹，真係可以搞番間星級小三勸退諮詢顧問公司，專責幫偷食嘅人夫唔使離婚保住頭家，親自同小三同大婆談判講數，四四六六拆掂佢！同時再附加個跟蹤服務，即係幫大婆跟蹤個老公有冇偷食，又或者點防止被人跟蹤自己去偷食！雖然白百何離咗婚先至嗒小鮮肉，但一樣有商機，針對時下分手同離婚高企嘅情況，可以搞番個愛情或婚姻保險服務，喺指定限期入面分手或離婚，雙方都有保障，就算被人笑到面黃，有舊錢使吓都好吖！
Nuts哥