扮嘢王黃建東冧掂瑪姬一味夠Cheap

藝人黃建東於2011年參加香港先生選舉入行，家住公屋的他一直在無綫默默耕耘，去年憑惡搞短片熱爆網絡，成為「新一代扮嘢王」！事業方面人氣急升，原來其感情生活同樣美滿，秘密搭上王祖藍旗下藝人、前DJ瑪姬！兩人在愚人節上載求婚照，事後澄清只是開玩笑，但早前翹手出席晚宴，期間更開口互讚，表現曖昧！本報日前拍得他們在雨中甜蜜掃街，臨別更不捨擁吻，拍拖斷正！

依依不捨啜面珠

兩人當日現身尖東街頭，期間下起雨，瑪姬即翹住Derek的臂彎，齊齊走到一間食店「搵食」。Derek用數十元買了一碗魚蛋及一碗燒賣，起初兩人各有各食，Derek其後忍不住主動出擊，餵對方食魚蛋，瑪姬亦禮尚往來餵食燒賣，兩人餵來餵去，認真甜蜜！Derek見女伴嘴邊沾到醬汁，即細心地用紙巾幫她抹嘴，抹完後順手抹自己的鼻，一張紙巾兩份用，關係非淺！

東東同瑪姬你餵吓我，我又餵吓你，相信只食到甜味！	黃建東幫瑪姬抹嘴，再用同一張紙巾抹鼻。	放大圖片

食飽後他們繼續雨中浪漫，Derek幫瑪姬戴帽，深怕戴不穩再出手撫摸她的頭，摸完頭索性摸埋膊頭！兩人轉場到咖啡室，Derek買了一杯飲品及一件蛋糕，瑪姬全程坐定定，但支付了數十元，實行AA制。兩人甜蜜談心，瑪姬不時被氹得開心大笑，他們一杯飲品兩份飲，一件蛋糕兩份食，夠晒慳！兩人其後離開咖啡室，Derek沿途Man爆護花送女伴取回座駕，瑪姬則明顯冧爆。臨別依依的他們四目交投，Derek忍不住攬實瑪姬，更親吻對方的面，目送她開車離開後才捨得轉身走人，認真癡纏！

低調談情護花

記者昨日致電Derek，對於被本報拍得與瑪姬在街邊拍拖篤魚蛋，他聞言即尷尬傻笑，問到兩人關係？他說：「好……朋友。（有幾好？）Er……總之好朋友，你哋影到啲咩？（一齊食魚蛋？）哦，朋友分享嘢食啫！（追佢？）Er……認識緊。（你幫佢抹嘴？）吓？我哋有咀？（抹嘴！）哦，正常，朋友個嘴污糟咗。」問到是否拍拖？他死口唔認：「好開心囉！（下次帶人食貴啲嘅嘢？）我好貼地同平民。」他透露雙方曾結伴睇戲，但未去過對方香閨，亦沒試過親嘴。問到是否有機會發展？他說：「唔知o架，要睇對方，唔係我話事。（拍拖會公開？）感情事我好低調，因為係私人事，同埋想保護對方，費事影響佢。」

文：音樂組