童年偶像「初哥哥」現身 柏豪撕背心晒肌後空翻搏命

男神周柏豪前晚在紅館開騷,在壓軸環節剝衫大騷爆肌身材,讓歌迷大飽眼福,更赤裸上身打後空翻,型爆全場!而柏豪在「童年」的環節請出張智霖做嘉賓,雖然他稱沒有特別意思,但仍表示細細個已看對方做戲!

歌手周柏豪於紅館舉行的一連三場《One Step Closer Pakho Live 2017》前晚開鑼,適逢這是紀念他入行十周年的演出,亦是他約滿華納唱片前的最後一擊,所以亦搏到盡,除了秘密苦練跳舞外,他唱到《金》時,一度拉高黑色背心吊觀眾癮,到最後才撕爛背心,大晒胸肌及六舊腹肌,赤裸上身的他再打一個後空翻,令觀眾尖叫聲不斷!

眼濕濕讚老婆偉大

嘉賓方面,柏豪請得張智霖(Chilam)現身合唱他心中的神曲《祝君好》,更以「初哥哥」來稱呼對方。Chilam笑問柏豪為何在以「童年」為題的環節才叫他出來:「我唔會喺你小時候嘛?」柏豪即指沒有特別意思,但仍不慎說出細細個已看對方演戲,惹來全場大笑。當柏豪唱出《百年不合》時,曾與他合作拍劇的黃翠如突然驚喜現身,不過穿婚紗的翠如BB並非開金口合唱,只站在柏豪身邊做動作。

向來將感情事低調的柏豪亦罕有大談與太太Stephanie多年來的點滴,他感觸說:「我同佢喺我未入行已識,我哋一齊咗十幾年,佢將佢最黃金嘅青春奉獻畀一個未必寫包單嘅人,我知自己係麻煩友,喺人生搵到個完全體諒自己嘅人真係好難,但我搵到!」提到與太太去年11月於布吉低調結婚,卻被狗仔隊偷影一事,柏豪眼濕濕說:「我哋唔知點算,籌備咗好耐,想低調,佢突然問我『個婚禮使唔使hold住?』佢好偉大,可以為我做任何嘢!」之後唱出寫給太太的婚禮歌曲《終於我們》,螢幕上就顯示兩人的剪影合照。而柏豪昨晚第二場的嘉賓為許志安,安仔於下午五時多已到達紅館綵排。

跳fuse超時或被罰

另外,因紅館前日跳fuse,令柏豪的個唱要延遲開始,完場時間亦因此超出15分鐘而可能要罰錢,華納唱片表示正與紅館商討罰款等問題。

文:音樂組

攝:劉智源