泰拳轉戰詠春陳嘉莉鋪路銀幕擺擂台

由模特兒轉戰影壇的陳嘉莉,從小已是男仔頭,有功夫底子熱愛打拳,現時又學詠春,絕對有潛質做打女!不過,她謙虛表示未夠班,要苦練多幾年打好個底先。

陳嘉莉(Kelly)去年9月簽約蕭定一成為旗下藝人,由模特兒轉投大銀幕,雖為新人,但已有不少發展機會,早前有份客串《小男人周記3》,現則主攻內地市場,有不少內地劇及電影洽談中。

外表斯文的她原來一直有打泰拳,還上過擂台比賽,最近則愛上玩詠春,她說:「之前學開泰拳,對詠春唔了解,聽人話好悶,節奏好慢。初初都係跟師姐Hazel去觀摩吓,之後開始學,發覺原來威力好大,好啱我,近身攻擊用好多內力,依家愛上咗會專心攻詠春。(想走打女路線?)都想,但要睇機遇,依家好多人想做打女,唔係講就係,要練個功夫出嚟,成個架、個底要打得好,我覺得畀我練多幾年先。同埋角色唔到我揀,依家仲係新人,咩都想試,只要唔係唔健康就得。」

甩崔建邦搵新歡

Kelly因與藝人崔建邦拍過拖而為人熟悉,雖已分手一年多,但二人的名字仍常常被拉在一起。問到喜歡泰拳是否受對方影響?她說:「唔關事,我一向男仔頭,細個已經學跆拳道,識佢嗰陣佢已經好少打泰拳。(早前佢打擂台輸畀15歲拳手?)我冇睇,但都撐佢,我都上過擂台,上得擂台要好有勇氣,同埋要有意志力。(你哋以前有冇切磋過?)冇,學還學。」

感情方面,Kelly已完全放下這段情,問到是否有新戀情?她甜笑說:「了解中,有對象,但未成事唔好講住。(公司會否唔鍾意你拍拖?)公司畀好大自由度我哋,好支持我,但我想以工作為先,工作上啱啱先開始,感情冇特別嘢講住,想做住朋友先。」

文:名人組