傳撻着陳瀅方力申認飲嘢冇避忌
藝人方力申和陳瀅去年不約而同甩拖，近日盛傳兩人秘密撻着，被影到在蘭桂坊密會，更有傳兩人老友張繼聰、糖妹幫手做媒，昨日陳瀅的經理人表示冇回應，而小方說：「嗰日其實同４、５個朋友去飲嘢，有男有女，當中有糖妹、陳瀅，因為係朋友，所以喺中環蘭桂坊飲，都冇乜避忌。」
阿聰則對兩人傳拍拖表示不知情：「同小方八卦吓？我哋男人好少講呢啲喎，我估應該就唔係喇，最近全個世界我只係關心自己個女同老婆，其他人嗰啲嘢我都冇理。」糖妹就替好姊妹否認：「肯定唔係，一定唔係，（你做媒人？）梗係唔係，我邊得閒！我覺得呢單嘢好無聊。」
當日小方與陳瀅在蘭桂坊「飲嘢」，糖妹也在現場，她在電話中說：「嗰度係中環地舖好開揚，如果係拍拖都唔去嗰度。」她覺得大家同圈中朋友聚會好普通，她說：「嗰晚有5、6個人，其實係我同陳瀅先食飯，知呢邊有朋友先過嚟飲嘢，之後我同陳瀅早走，因為我哋再去另一班朋友度飲嘢。」