黃秋生失眠四級版海外有機會上映
影帝黃秋生、衛詩雅及麥子樂前晚出席英皇電影《失眠》首映禮，當晚更播出一刀不剪的「四級」導演版。足本版只有在21日的香港國際電影特別場播出，星馬、台灣及日本等地則有申請播四級版。新片充滿血腥及切男性生殖器官劇情，問秋生可擔心上映時難逃一剪？他說：「電影上映一定係三級，今晚直情係四級，但三級版剪得好留手，因為好多場面係有需要，呢套係導演邱禮濤最可以掌握、唔使為市場同娛樂性而拍嘅戲。（香港仲有冇四級版？）其他地方會有原裝版，但唔會喺香港，係可惜o架保留喺人哋度。好似日本當咗《人肉叉燒包》、《伊波拉病毒》同《的士判官》係經典，仲搞埋電影節。其實加埋呢套先係三部曲。意大利同歐洲都好鍾意，呢個係文化，唔係娛樂咁簡單。」
同親人傾偈抗抑鬱
另外，黃秋生近日在網上分享抗抑鬱的感受及方法，他指當年三十多歲攞完影帝後患病，抗抑鬱方法是睇書學的，他承認方法奏效：「一定要同人傾偈、要有親人、可能有宗教信仰、有信念、做運動、瞓覺同食飯，去保持自己精神健康。」
衛詩雅被姦有陰影
衛詩雅在戲中遭林家棟強姦至周身瘀傷，她說：「拍嗰陣唔知，因為投入咗角色，後來睇番先發覺原來尺度幾大膽。」她又指拍被姦戲後留下陰影，事後不敢見到林家棟，直到近期在金像獎碰面才消除陰影，但衛詩雅坦言對接到有挑戰性的角色感高興：「一人分飾兩角係好大挑戰，感覺係為香港女演員爭光。（再接強姦戲？）短期內唔會，要睇劇組同導演。（驚唔驚嚇親男友同家人？）男朋友就冇，但真係唔敢畀屋企人睇，驚佢哋心痛。」
文：影視組