發哥家燕笑晒送祝福 阿倫戥城城「入球」開心
「樂壇校長」譚詠麟昨日到電台宣傳新碟，談及郭富城昨日與內地模特兒方媛在港舉行婚宴，問阿倫染了紅髮及穿紅衫是否準備去飲，他反問：「今日？真係呀？佢冇請我，佢都係請屋企人、雀友嗰啲。」又指和城城稔熟是踢足球的波友，阿倫說：「我哋一齊踢波，係雙鬼拍門，我成日交波畀佢，佢入球靠我。（佢結婚戥佢開心？）開心，依家『入球』。」他又表示在食肆曾與「城嫂」方媛有過一面之緣，並讚說：「好Nice、客氣、有禮貌、好人、靚，青春無敵！」
曾與城城合作拍電影的周潤發，昨午一身行山裝束再現身養和醫院探望母親，問他可會赴城城的婚宴，他說：「係咩？咁恭喜佢。（去飲？）可能我換件衫就去喇！」說畢笑笑口揮手離開。
而薛家燕昨午現身半島酒店，全程笑騎騎的她表示只是路過，並非去飲城城的喜宴：「啱啱去完銀行，行嚟呢度上車。」又不忘對城城大婚送上祝福：「祝佢永結同心，甜甜蜜蜜。」又反問記者：「喺呢度擺酒？」她續透露兒子今年也會結婚擺酒，但尚未開始着手籌備。
