本報上月底才獨家爆內地男星黃曉明將首度進軍荷里活，參演《逃亡大計2》與荷里活動作巨星史泰龍合作，現時曉明亦已埋位拍攝，與龍哥握拳互揪擺甫士，仲拜對方為師！
繼老婆Angelababy去年拍《天煞地球反擊戰：復甦紀元》（Independence Day: Resurgence）進軍荷里活之後，本報上月底亦獨家爆出黃曉明緊隨其後，參演由中國獅鼠影業與美國Emmett/Furla/Oasis合資的新作《逃亡大計2》（Escape Plan 2：Hades），跟史泰龍（Sylvester Stallone）合作，威水打入荷里活！
電影於較早時間已開始進行拍攝，最近終於輪到曉明埋位，史泰龍前日立即在官方社交網站Instagram上載二人合照歡迎對方加入，齊齊擺出手握拳頭、扮互揪的甫士，留言：「黃曉明係非常特別及有才華嘅演員，我將在《逃》中同佢度過歡樂嘅工作時光。」更大讚曉明的拳頭又硬又有速度。
見到「龍哥」咁客氣，曉明亦在微博留言賣口乖：「來美國認了個師傅，跟這位全球最猛的硬漢一齊為《逃2》戰鬥。」公開拜史泰龍為師。從現場的花絮照可見，曉明穿上囚服、谷出麒麟臂，應該跟史泰龍一樣都是演囚犯角色。據知，日前有網友在美國亞特蘭大遇到曉明夫婦，看來Angelababy特別做埋「跟得老婆」隨老公到美國拍戲。
《逃2》故事講述飾演逃獄專家的史泰龍，其好友Shu Ren突然遭人綁架，被關進一間高科技的監獄，史泰龍跟團隊合力救出Shu Ren，而曉明很大機會就是飾演「Shu Ren」一角。
文：外娛組