森美狂踩麥美恩唔紅兼醜樣！
由森美領軍的節目《學是學非》宣布大換血，其死對頭麥美恩被嘲「唔紅」所以要留低！遭森美起勢狂踩的她，笑言睇中森美囝囝恨做「梁」家婦女，卻被森美踩爆：「我唔想個孫醜樣呀！」
藝員森美、麥美恩（Mayanne）、湯洛雯及梁嘉琪昨日為節目《學是學非》錄影，應屆港姐馮盈盈（Crystal）、劉穎鏇（Tiffany）及張寶兒將加盟做「是非精」。提到陣容「大換血」，森美笑說：「紅嘅（黃心穎、李佳芯、張秀文）去晒拍劇，啲唔紅嘅咪留番喺度囉！平均年齡都拉低咗，由『AKB32』去到30，智商反而高番！」
浸溫泉被彈嘥水
Mayanne透露早前與Tiffany及張寶兒到日本為節目拍外景，笑言未有機會浸溫泉：「導演怕我落去會令水位上升，嘥晒啲水！」森美聞言寸爆：「心穎、秀文喺度就應該去啦！」問Mayanne在當地有否遇上星探？森美笑她可到外國拍攝，演「飢渴熟女」：「外國人唔識分中國人點為之靚，你大把市場！」
提到Mayanne的緋聞男友許文軒，森美又即發動攻勢：「佢有人要就好咯，畀啲心機喇！唔好成日『猴』住我個仔，我驚個孫醜樣呀！」Mayanne卻黐實對方詐嬌：「我要做『梁』家婦女！（森美本名梁志健）」森美即時耍手擰頭，笑稱要揀Tiffany，但聞對方只得19歲，就表示要交畀囝囝，認真搞笑。
新成員Tiffany與Crystal表示不會有港姐包袱，Crystal說：「之前同森美做《千奇百趣特工隊》，整蠱咗佢20集，加上我哋係六對一，唔擔心！」Tiffany則笑言擔心自己轉數不夠快，難以應付森美的笑彈。
文：影視組