王祖藍玩大咗！李亞男先甜後苦
「橋王」王祖藍向來計仔多多，演員、編劇、司儀瓣瓣掂，最近再下一城任工作室老闆，短短半年已羅致18名藝人到旗下！祖藍否認想做娛樂大亨，坦言成立工作室原意是處理夫妻工作，沒料愈做愈大。他笑言現時每日24小時不夠用，生B計劃最少要延至2018年，指太太李亞男乃賢妻良母型，生B後定必長時間照顧小朋友，所以會讓她先甜後苦，過完甜蜜二人世界才造人！
誤打誤撞簽咗18個藝人
瓣數多多的王祖藍近年除了拍劇、編劇等工作外，還到內地參與真人騷節目，身價及名氣亦隨之幾級跳，賺到盤滿缽滿後，早前更於香港成立工作室。談到箇中原因，祖藍表示要由兩年前於內地工作講起，當時參與節目《奔跑吧兄弟》，與一班同事拍住上，漸漸產生默契，及後見公司運作上軌道，便計劃於香港成立工作室，主要處理他與太太的日常工作。惟消息傳出後，其手機便響個不停，祖藍說：「啲朋友誤會咗，問我會唔會簽人，跟住傾吓傾吓就到依家咁，有成18個藝人。（點分身？）最緊要識放手，唔同人處理唔同事，咁啱舅父冼偉智喺亞視工作完咗，佢又有管理藝人經驗，所以香港呢邊佢幫我手，北京就畀我遇上好團隊，兩年來合作開心，有同事幫手運作。」
刺激市場目標不僅內地
雖然公司人才鼎盛，但祖藍仍嫌稱是細公司，問到公司未來方向，他即滔滔不絕表示目標不僅是內地：「華語市場都重視，廣東話市場就有香港同澳門，亦有好多工作傾緊，希望能夠招攬多啲普通話市場，等我哋去到北面地區，畀多啲人知香港仲有好多好藝術家、演員同歌手，都有好多人才。（做娛樂大亨？）唔係，只係稍為刺激吓個市場，當初寫《老表》系列，係咪改變成個娛樂圈？冇可能，我哋力量咁小點可以發呢個夢，喺某個角度刺激到編劇市場，依家搞娛樂公司一樣，我哋唔可以改變大氣候，但刺激少少市場，帶多啲工作機會畀大家。」
談到他於內地人氣高企，絕對有Power帶領藝人進駐內地市場，祖藍對此卻有另一番見解。他承諾會盡力而為，睇餸食飯，但認為不可以硬推，要看準時機及事件適合與否才實行，否則便適得其反，而最重要是自己先要企得穩，笑言現時尚算不俗：「呢啲嘢上落好快，都要做好多準備同安全部署，好似依家興真人騷，都唔可以全部嘢喺晒嗰度，要喺劇、影視、網絡度平均分布先得，過分經營唔健康。」
唔造人住畀太太抖吓先
每日工作排山倒海，祖藍不諱言一日僅有24小時絕對不夠用：「工作之外都要家庭生活o架，唔可以因為咁唔理太太同阿媽嘛！」結婚兩年的他雖然喜歡小朋友，但卻暫未能實踐「造人大計」：「要晏啲先，起碼過埋呢年，啱啱先同太太搬出嚟自己住，30幾歲仔先唔同媽咪一齊住，仲買咗樓畀細佬妹先搬出嚟，如果真係生咗仔，可能都係得番呢年兩個人，所以唔想太快生，太太係賢妻良母型，佢生咗就會長時間去湊，惟有正式做媽媽前好好對佢，我會畀佢先甜後苦。」
買樓投資給家人安樂窩
自嘲沒有投資心水的祖藍，表示只懂得買磚頭，繼去年豪花逾億買獨立屋與太太李亞男過二人世界後，再付800萬首期給家人於同屋苑買下花園特色戶，問到為何如此豪爽？祖藍說：「有能力會將最好嘅畀屋企人，我賺10蚊可能畀咗8蚊屋企人，真正自己食要幾多？我冇額外投資，媽媽同細佬妹一齊住，佢哋都要負責任，我只係首期幫一幫，細佬妹我都要衡量吓佢哋可以負擔到幾多，唔可以養晒，咁就唔健康。（再投資？）有機會想試少少，炒股票又冇時間睇，有可能都係物業比較多，買完唔使睇，只要睇入市時間啱唔啱，暫時唔會再入市住，諗吓先。」
文：影視組
攝影：吳文聰
場地：A La Maison XXL Seafood & Grill
服裝：METAMOR
髮型：Ted Yeung
化妝：K.T. Tsui