娛樂
配音員馬家豪賤格星腔上位
馬家豪表示想鍛煉出一把令人感動到想喊的聲線!
加盟無綫兩年多的35歲配音員馬家豪外貌有點似陸浩明,然而他的聲線和腔口有九成九似周星馳,眾星迷如想聽聲解「星癮」,大可從無綫《千奇百趣特工隊》等綜藝節目中「回味」一下!
藝人周星馳退居幕後,星迷大嘆可惜,冇樣睇齋聽聲就可一解「星癮」的話,大家可從無綫《千奇百趣特工隊》及一些綜藝節目中「回味」。加盟無綫兩年多的35歲配音員馬家豪,因聲線和腔調有九成九似周星馳而被起花名做「馬爺」,家豪接受訪問時同樣以「星腔」笑說:「我何得何能!因為《千》監製張志明覺得我把聲講嘢時賤賤格格,又有啲似周星馳,其實大家都係睇佢啲戲大,佢嘅神韻都入晒腦,而我同一班幕後大哥拍嘢混熟咗,所以先起呢個花名!」
讚林保全後無來者
陸浩明
馬家豪表示學過正統配音訓練,更上咗三堂就學成!
由娛記出身再入職無綫做幕後,監製張志明覺得馬家豪的聲好而將其力薦為綜藝節目配音。馬家豪亦對資深配音員林保全很敬重,身為後輩的家豪大讚保全叔是神級配音員,對於做保全叔接班人,他說:「完全不敢當!大家都聽佢聲入腦,保全叔係神級聲,佢配《多啦A夢》嘅聲係冇人能代,好可惜保全叔過咗身,其實保全叔在前,冇人在後了!」
「星腔」的馬家豪為了入行,曾接受正統配音訓練,他說:「讀初班時上咗3堂,阿Sir已叫我出去接Job,幫電影片段配音,除配人聲,我連打鬥反應聲都自己配埋出嚟,其實呢啲喺初班未學到,但我就自動波做晒,阿Sir覺得我唔使嘥時間啦,上咗3堂交咗三百蚊就學成出嚟!」
「翻版6號」想試幕前
提到目標,家豪原來想訓練出一把令人感動到「想喊」的聲線,外形有着主持陸浩明(6號)影子的他甚至想當幕前:「對影藝圈都好有興趣,除聲演到多類型角色,主持都想試,如果監製有興趣,我都好盼望幕前演出。」
文:影視組