文恩澄愛Casual專掃平Tee
藝人兼導演文恩澄（Rannes）性格較男仔頭又不愛打扮，加上是慳妹一名，家中的衣帽間沒有太多昂貴的華衣美服，多數是T恤牛仔褲，只有小量較隆重的晚裝裙，名牌衫更不多過五件。Rannes表示衣櫃裏大部分是Casual款T恤，因為之前較少做幕前，加上做導演時，Casual衣着較適合她：「我行步路都粗魯過人，着啲好女仔嘅衫，仲影衰件衫啦！」
Rannes因為不愛丟棄衣服，單計T恤已有逾六十件以上，還未計其他衣、褲、鞋及飾物，所以近六十呎的衣帽間已塞到爆。問她是否購物狂？她說：「其實我唔係成日買衫，不過一買就會買好多，同埋全部都係平價貨，最平嗰啲T恤只要廿蚊人民幣，我記得嗰啲係喺內地做嘢時買嘅，又平又靚、質地又好，一次過買咗十幾件，有啲就送畀朋友。（鍾意買平衫？）係呀，如果件衫貴過二百蚊港幣，我都唔捨得買。」
Rannes又指身上的黑白色背心裙是最愛、最有紀念價值的「戰衣」：「條裙係2008年啱啱入樂壇做新人時，經理人送畀我嘅，佢話送條靚裙畀我，等我着靚啲。條裙都9歲喇，但仲保存得好好，新嘅一樣，我第一次着呢條裙係出席記者會，之後就唔捨得着，要好好珍藏。」
