陸永C君凹凸冰火17年

C君表示與陸永從外表體形完全屬於兩極，體質上亦有「寒底熱底」之分，C君說：「我就最怕熱，陸永就最怕凍，會有咩問題？」陸永笑言：「咪就係坐長途車嘅時候，我會凍死，我等佢一瞓着，我就熄咗個冷氣囉！」C君即說：「我咪又等佢瞓着，開番大個冷氣。」兩人在保母車經常體驗五、六個鐘的「冰火」過程，陸永對於熱底C君不禁作出投訴：「所以，我次次瞓醒起身都中招病咗囉。」

寸考車牌累街坊

講到車，陸永至今未有車牌，而C君則是有車階級，陸永說：「佢鍾意揸車，我就鍾意坐車多啲。我個人方向感好差，行路都會迷失，去幾次都會行錯路。」C君笑言：「我唔會勸佢考車牌o架，因為除咗為佢全家上下安全着想，亦都係為全港市民着想，費事令其他道路使用者都好危險。至於我就鍾意揸車多啲，想去邊就去邊，坐車會暈車浪呀！」

陸永婚後與太太Rainah很恩愛。	大女陸一穎 兩名女兒是陸永的心肝寶貝。	細女陸一心

寡佬唔敢諗結婚

至於寡佬C君何時加入陸永的人夫行列？C君抵死笑道：「結婚問題要諗吓。」在旁的陸永口痕加把嘴：「我就冇諗你再結婚嘅。」C君當然不放過窒他的機會：「你直情係冇諗結婚啦，你唔小心啫（奉女成婚），想結嗰個未結到，唔想結嗰個就結咗，呢個同你反差最大啦！」

陸永（右）與C君合作17年，默契十足。	陸永、C君自認是娛樂圈中游分子，搵錢多未輪到他們。	農夫與鄭裕玲、黃翠如（右）同遊法國。

對於陸永已是兩女之父，C君笑言：「當我見到佢有小朋友……可以話前車之鑑。我一直以為生小朋友都幾好吖，但一見到陸永依家……咁就唔好嘞，呢三十年都唔好搞我住，或者一生出嚟就係大人可以返工搵錢，就可以考慮！除咗經濟支出大，就連精神狀態都一樣以雙倍計，帶住小朋友去旅行都夠令你頭都大埋啦！」陸永即時反擊：「對住自己小朋友好開心o架，呢種開心係要擁有自己小朋友先會感受到，玩人哋嗰啲感覺完全唔同。」

仲未有資格供樓

講到儲錢能力，誰是守財奴，誰是大花筒？兩人都渴望當守財奴，奈何生活逼人被迫做大花筒，陸永說：「儲錢我唔叻，因呢方面其實好局限，所謂儲錢，即係要你使唔晒、剩落嚟嘅錢。（交畀老婆理財？）都唔使理財，因為出糧啲錢都去得七七八八嘞，養頭家好重負擔o架！」C君指農夫是最貼地藝人：「你哋所有人捱緊嘅嘢，我哋都一樣捱緊，甚至乎可能大家仲叻過我哋，因為我哋都未捱到可以有資格去供樓。」

講到搵錢未入流

兩人大呻純粹是表面風光，工作量多，不代表收入是大豐收，C君笑言：「當然我哋唔係處於水底嘅，但距離水面仲有好大距離囉！我哋係中下游分子咋，仲要視乎啲水幾深。」陸永則說：「呢個圈貧富懸殊好大，講高收入，我哋邊算係高，有啲藝人做一樣嘢等如我做一世o架喇，甚至投胎一百次咁滯，有啲真係搵一年或者接一個Job就搵到大家一世嘅錢，所以我哋叫搵到？未入流啦！」

後記：冇錢豪遊

農夫兩個大男人經常因工作去外地遊山玩水，之前拍節目就去英國「遊學」一周，又跟過Do姐（鄭裕玲）去法國Shopping好梳乎，但一講到私下放假旅行，兩人就搬出「水底論」，話旅行地點仍「好窄」，要睇餸食飯，好似馬爾代夫呀、芬蘭睇北極光呀，屬「好闊」的旅遊勝地，根本冇錢去，連日本都唔敢踏足，怕一鋪「清袋」返唔到嚟！C君和陸永都話呢方面大家係最冇矛盾。

文：音樂組　

攝：張福宏