Jeana台灣炒車撼頭：差啲上得香畀我！

女星何佩瑜（Jeana）近日身在台灣拍攝新戲，至周五順利煞科後準備起行回港，卻在前日早上不幸遇上交通意外！Jeana乘坐的七人車在墾丁前往高雄的公路上突然失控，猛力撼向石壆，車頭及車側炒至凹陷變形。而正於副駕駛座休息的Jeana來不及反應，頭、眼、鼻撞傷，同車的馬來西亞小演員盧宣彤亦撞傷頭及下巴，兩人隨即被送院救治，經檢查及照X光後確認傷勢冇大礙，均已出院。

口罩遮腫樣

Jeana按原定行程，於昨日下午返抵香港，導演男友翁子光趕到機場接機。素顏的Jeana戴上Cap帽、口罩低調步出離境大堂，見她的鼻樑明顯有紅腫，翁子光即時上前幫女友推行李，又除下外套讓女友披上。Jeana見到男友終於面露笑容，一掃陰霾，但回想到意外一幕，仍心驚膽跳：「發生嘅時候，唔係好知乜事，因為嚟得太突然，我都係第一次遇交通意外。我喺醫院諗番轉頭，如果我哋架車當時係撞向另一邊，就會碌落山，差啲上得香畀我，諗番都心寒，所以真係好好彩！以前聽就聽得多，今次真係感受到車禍嘅撞擊力，仲要撞到咁大力，想像唔到架車反轉會點，真係好危險！」

Jeana乘坐的七人車車頭及車側凹陷變形。	救護人員為Jeana檢查傷勢。	意外發生後，Jeana送院檢查、照X光。

驚後腦有事

見女友驚魂未定，問翁子光會否擔心？他說：「佢受傷有打畀我，梗係擔心啦！當時做緊嘢，以為佢有咩事。（見到相先知驚？）冇即時見到相，知道佢皮外傷，同埋有頭暈，驚後腦有事，好彩照X光冇大礙。（即刻飛過去陪女友？）我都想，但我去都冇用，醫生先醫到佢。（心靈上幫到佢。）有劇組照顧佢，好彩套戲已經拍完。今次撞車冇佢上次潛水咁擔心，佢潛水嗰次又喊又盛，其實真係好危險，水又凍，每次落水前都要用凍水淋身，適應水溫。當時有去睇佢，雖然自己唔得閒，要準備新戲。（之後會陪女友？）之後都會陪佢，嚟緊工作唔會遠，都係中港兩邊走。（娶咗佢咪唔使擔心？）兩件事都唔『啦更』！」

何佩瑜	起身見頭暈的Jeana，送院後需要坐輪椅。	Jeana雖戴上口罩，但鼻樑位置明顯紅腫！

而受傷的Jeana表示工作安排未受影響：「已經好幸運，返到嚟之後要誠心還神，好好抖吓，係鼻同眼有啲腫，之後4月9日先出活動，相信一星期可以消腫。意外時冇喊，因為當時瞓緊覺，唔係好理解到發生咩事。」

文：影視組