安俊豪死裏逃生 腳震失眠
曾在《亞洲星光大道星級舞鬥》奪冠的歌手安俊豪（Simon），前晚在旺角一間band房練歌，隔籬房的電掣疑因短路着火，火勢迅速蔓延，他即衝過去勇救一名被嚇呆的女子！Simon昨日猶有餘悸，他說：「個女仔呆咗坐喺度，開頭我都唔識驚，同消防員講事情經過先愈嚟愈驚，因為啲火好大，我哋走出間房20秒就傳出第一下爆炸聲，啲火已經攻出嚟，離死亡咁近，嗰時腦海閃過好多畫面，諗要做啲乜。（例如？）如果有乜事，我想返屋企飲阿媽啖湯，總之思緒好亂。」
Simon憶述走火警時，走落樓下兩層叫商戶內的人盡快逃生，他說：「其中一間唱片舖有顧客，我叫佢哋走火警時，佢哋反應唔大，冇逃生意識，有人問：『啲火會唔會燒落嚟？』又有人問：『我使唔使鎖門？』當時每層都好大煙，去到20樓見到消防員，叫我哋快啲疏散到地面。」
電話iPad全報銷
由22樓跑落街逃生的Simon說：「我冇腳軟，但有腳震。（有冇發噩夢？）冇，但成晚瞓唔着，不停諗番個畫面。」他表示是第一次到該band房，當時正在準備18區街頭表演：「因為聽日落荃灣busking，所以去嗰度練歌，其中一個朋友幫我拎咗個袋走火警，但冇攞到自己個袋，結果淋濕晒，入面嘅電話、iPad同歌譜都報銷。由於係我叫佢哋嚟夾band，令佢有損失，我都過意唔去。」
文：音樂組