荷里活巨星湯告魯斯（Tom Cruise）一向出名「點石成金」，凡是他欽點一同拍戲的「湯女郎」都例必走紅，如「前湯嫂」妮歌潔曼（Nicole Kidman）都因為拍他的戲而走紅至今。至於「前湯女郎」來自瑞典的莉碧嘉費格遜（Rebecca Ferguson）亦因為主演《職業特工隊：鬼影帝國》（Mission:Impossible-Rogue Nation）而為人熟悉！
現年33歲的莉碧嘉來自瑞典，一出道已被冠以「新英格烈褒曼（Ingrid Bergman）」稱號，二人無論是身形及樣貌氣質都似到足，不過莉碧嘉似乎對這個稱號有點抗拒！她說：「當然好開心被人話我似英格烈，其實我哋除咗同樣來自瑞典外，我絕對愧不敢當，對我嚟講，佢絕對係女神。」原來莉碧嘉除了愛演戲，亦鍾情唱歌，她說：「我快將16歲嘅時候就開始喺瑞典演電視劇，但其實拍劇前我讀過音樂學校，專修獨唱及合唱團，不過因緣際會下被選中拍劇，但其實我當時嚮往唱歌多啲。我唔係好喜歡被人睇實，之後就慢慢愛上演戲。」
翻查資料，原來莉碧嘉有個「猛料」媽媽！莉碧嘉的母親曾與瑞典國寶、殿堂級組合ABBA合作過，其母為ABBA的名曲《Waterloo》翻譯成英文歌詞。那麼莉碧嘉年幼時有沒有與ABBA成員見過面？她受訪時說：「我母親以前成日同佢哋一齊，母親畀過佢哋啲相我睇，我第一個反應就係：『吓，你睇吓佢哋啲衫！』然後母親就同我講嗰啲係佢嘅衫。我好傷心呀，因為佢已經將啲衫掉晒！」
除了莉碧嘉，近年荷里活「輸入」的瑞典外勞如阿歷山大沙格（Alexander Skarsgard）、Malin Akerman、Noomi Rapace和雅莉茜亞維嘉達（Alicia Vikander）都成功登陸荷里活並迅速走紅，莉碧嘉認為這情況之前在荷里活都出現過，她形容「瑞典人入侵荷里活」等同黑人在荷里活佔一席位一樣，絕對不足為奇。而莉碧嘉自從2014年首次演荷里活片《戰神：海格力斯》（Hercules）後片約不斷，除了被靚佬湯睇中拍《職》片外，亦在《走音歌后》（Florence Foster Jenkins）中跟荷里活巨星梅麗史翠普（Meryl Streep）合作。
最近她亦與荷里活兩大型男積佳蘭賀（Jake Gyllenhaal）及賴恩雷諾士（Ryan Reynolds）合演科幻大片《外星生命》（Life），對一個荷里活新丁來說絕對是機會難逢！莉碧嘉直認自己是幸運兒，並表示在一眾大明星身上學到了很多，如靚佬湯就幫助她好多：「佢過往拍過好多動作場面，所以拍嘅時候好冷靜。」
靚佬湯一向對女拍檔情有獨鍾，之前曾與妮歌潔曼及彭妮露告絲（Penelope Cruz）因合作而戲假情真撻着。之前有傳靚佬湯睇中《職》的莉碧嘉，有知情者指他冧莉碧嘉冧到將劇本重寫增加多些對手戲，希望在片中打情罵俏有助二人在現實生活中的戀情。不過，靚佬湯與莉碧嘉傳了一輪後，二人的緋聞隨着《職》落幕而結束。
姓名：Rebecca Ferguson
出生日期：1983年10月19日
出生地點：瑞典斯德哥爾摩
身高：1米70
情史：2007年她為前男友Ludwig Hallberg誕下一子
文：外娛組